قومی کرکٹ ٹیم کے وکٹ کیپر بیٹر محمد رضوان کو ون ڈے ٹیم کی قیادت سے ہٹانے کی وجوہات سامنے آگئی ہیں۔ ذرائع کے مطابق محمد رضوان خود بھی قیادت سے دستبردار ہونا چاہتے تھے اور اس حوالے سے انہوں نے ہیڈ کوچ مائیک ہیسن کو آگاہ کردیا تھا۔
ذرائع ٹیم مینجمنٹ کے مطابق محمد رضوان کی قیادت میں ٹیم میں اتفاق میں کمی نظر آئی ، جبکہ سابق کپتان نے اپنی انفرادی کارکردگی پر توجہ دینے کی خواہش ظاہر کی۔
ذرائع کے مطابق رضوان کی خواہش پر ہیڈ کوچ مائیک ہیسن نے پاکستان کرکٹ بورڈ کو کپتانی کے فیصلے کے لیے باضابطہ خط ارسال کیا۔
واضح رہے کہ محمد رضوان کو گزشتہ سال 27 اکتوبر کو قومی ون ڈے ٹیم کا کپتان مقرر کیا گیا تھا، تاہم حالیہ اجلاس میں شاہین شاہ آفریدی کو جنوبی افریقہ کے خلاف ون ڈے سیریز کے لیے نیا کپتان مقرر کر دیا گیا ہے۔
