بالی وڈ فلم دنگل سے شہرت حاصل کرنے والی سابقہ اداکارہ زائرہ وسیم نے نکاح کرلیا، جس کی اطلاع انہوں نے سوشل میڈیا کے ذریعے اپنے مداحوں کو دی۔
زائرہ وسیم نے انسٹاگرام پر نکاح کی تصاویر شیئر کیں جن میں ان کا اور ان کے شوہر کا چہرہ ظاہر نہیں کیا گیا۔ تصاویر میں زائرہ وسیم سرخ رنگ کے عروسی لباس میں ملبوس نظر آ رہی ہیں، جبکہ ان کے شوہر آف وائٹ قمیض شلوار اور ہم رنگ شال اوڑھے ہوئے دکھائی دے رہے ہیں۔ ایک تصویر میں زائرہ مہندی لگے ہاتھوں سے نکاح نامے پر دستخط کرتی نظر آئیں۔
پوسٹ کے کیپشن میں اداکارہ نے صرف “قبول ہے” لکھا، تاہم شوہر کے نام یا دیگر تفصیلات ظاہر نہیں کی گئیں۔زائرہ وسیم کے نکاح کی تصاویر سوشل میڈیا پر تیزی سے وائرل ہو رہی ہیں اور مداحوں کی جانب سے ان کے لیے نیک تمناؤں اور دعاؤں کا اظہار کیا جا رہا ہے۔
یاد رہے کہ زائرہ وسیم نے 2019 میں بالی وڈ کو خیرباد کہہ دیا تھا۔ انہوں نے اپنے بیان میں کہا تھا کہ فلمی کیرئیر کے دوران شہرت تو ملی، مگر اس کی وجہ سے وہ اپنے مذہب اور روحانیت سے دور ہو رہی تھیں، اسی لیے انہوں نے شوبز انڈسٹری چھوڑنے کا فیصلہ کیا۔
