ہفتہ وار مہنگائی میں مسلسل تیسرے ہفتے بھی اضافہ ہوگیا۔ گزشتہ ہفتے مہنگائی 0.49 فیصد اضافے سے 4.57 فیصد تک پہنچ گئی۔
ادارہ شماریات کے مطابق گزشتہ ہفتے کے دوران ملک میں 24 اشیائے ضروریہ مہنگی، 8 کے نرخوں میں کمی آئی۔ گندم آٹا، لہسن، آلو، گھی، لکڑی، ایل پی جی مہنگی ہونے والی اشیاء میں شامل ہیں۔
ادارہ شماریات کے مطابق ٹماٹر 33 فیصد، پیاز 9 فیصد اور انڈے 2 فیصد سے زائد مہنگے، ایک ہفتے میں ٹماٹر 82 روپے کلو مہنگا، اوسط قیمت 328 روپے کلو ریکارڈ کی گئی۔ مختلف شہروں میں ٹماٹر 170 سے 420 روپے فی کلو تک فروخت کی گئی۔
رپورٹ کے مطابق 20 کلو آٹے کا تھیلا 30 روپے مہنگا، اوسط قیمت 2180 روپے رہی، مختلف شہروں میں 20 کلو آٹے کی قیمت 1810 سے 2900 روپے رہی۔ گزشتہ ہفتے چینی 67 پیسے مہنگی، اوسط قیمت 185 روپے کلو رہی، بعض شہروں میں چینی کے دام 177 سے 200 روپے فی کلو رہے۔
زیرجائزہ عرصے کے دوران زندہ برائلر مرغی 6.38 فیصد، کیلے 5 فیصد تک سستے ہوئے، دال چنا، باسمتی چاول، دال مونگ، پیٹرول اور ڈیزل بھی سستا ہوا، گزشتہ ہفتے میں 19 اشیائے ضروریہ کی قیمتوں میں استحکام رہا، سالانہ بنیاد پر ٹماٹر 121 فیصد، چکن 30 فیصد، دال چنا 29 فیصد تک مہنگی ہوگئی۔
