راولپنڈی کی انسداد دہشت گردی عدالت نے 26 نومبر احتجاج کیس میں بانی پی ٹی آئی کی بہن علیمہ خان کے ناقابل ضمانت وارنٹ گرفتاری جاری کر دیئے۔ عدالت نے ملزمہ کے ضامن کو بھی نوٹس جاری کرتے ہوئے حکم دیا ہے کہ علیمہ خان کو عدالت میں پیش کیا جائے۔
خصوصی عدالت کے جج امجد علی شاہ نے کیس کی سماعت کی۔ علیمہ خان اور ان کے وکیل عدالت میں پیش نہ ہوئے۔ ملزمہ کی جانب سے حاضری سے استثنیٰ کی درخواست بھی دائر نہیں کی گئی۔
پراسیکیوٹر ظہیر شاہ نے مؤقف اپنایا کہ علیمہ خان جان بوجھ کر پیش نہیں ہو رہیں اور قانونی عمل میں رکاوٹ ڈال رہی ہیں۔ انہوں نے عدالت سے استدعا کی کہ ملزمہ کے ناقابل ضمانت وارنٹ گرفتاری جاری کیے جائیں اور ضمانت منسوخی کا شوکاز نوٹس دیا جائے۔
عدالت نے دلائل سننے کے بعد علیمہ خان کے ناقابل ضمانت وارنٹ گرفتاری جاری کر دیئے۔ عدالت نے ضامن کو نوٹس جاری کرتے ہوئے ہدایت کی کہ ملزمہ کو آئندہ سماعت پر پیش کیا جائے۔ کیس کی مزید سماعت بیس اکتوبر تک ملتوی کر دی گئی۔
