آئی جی پنجاب عثمان انور نے لاہور سمیت صوبہ بھر کی سیکیورٹی بڑھانے کا حکم دیدیا۔
آئی جی پنجاب نے متعلقہ حکام کو ہدایت دی کہ مساجد، امام بارگاہوں، مزارات، مارکیٹوں، حساس مقامات کی سکیورٹی یقینی بنائیں، مساجد، امام بارگاہوں، کاروباری مراکز کے اطراف اور شاہراہوں پر پٹرولنگ بڑھا دی جائے۔
ڈاکٹر عثمان انور نے کہا کہ لا اینڈ آرڈر کا قیام، شہریوں کی جان ومال اور املاک کا تحفظ اولین ترجیح ہے، ڈی پی اوز سمیت سینئر پولیس افسران فیلڈ میں موجود رہیں، سکیورٹی انتظامات کا خود جائزہ لیں، دفعہ 144 کی پابندی پرعملدرآمد یقینی بنائیں کسی کو قانون ہاتھ میں لینے کی ہرگز اجازت نہ دی جائے۔
واضح رہے کہ گزشتہ روز جی پنجاب ڈاکٹر عثمان انور کی زیر صدارت اجلاس ہوا جس دوران لا اینڈ آرڈر، سکیورٹی صورتحال کا جائزہ لیا گیا ، آئی جی پنجاب نے کہا کہ جمعہ کو کسی بھی شخص کو ہڑتال کی آڑ میں سڑکوں پر آنے، قانون ہاتھ میں لینے کی ہرگز اجازت نہیں ہوگی۔
آئی جی پنجاب نے کہا کہ شہریوں کی جان و مال، املاک کا تحفظ، قانون کی پاسداری بہرصورت یقینی بنائیں گے، شرپسندوں، بلوائیوں سے آہنی ہاتھوں سے نمٹیں گے، توڑ پھوڑ، تشدد اور فساد کی صورت میں سخت ایکشن لیں گے، شر پسندی پر انسداد دہشت گردی ایکٹ کے تحت مقدمات درج ہوں گے ، 10 سے 14 سال سزا ہو گی۔
آئی جی پنجاب نے کہا کہ زندگی کا پہیہ چلتا رہے گا، مارکیٹیں، کاروباری مراکز، ٹرانسپورٹ، شاہراہیں کھلی رہے گی، 7 اے ٹی اے کے تحت پنجاب پولیس کو مطلوب درجنوں شرپسندوں کو آرٹیفیشل انٹیلیجنس بیسڈ ٹیکنالوجی کی مدد سے گرفتار کیا جائے گا۔
