موجودہ مالی سال کی پہلی سہہ ماہی میں تجارتی خسارے میں 33 فیصد اضافہ ہوگیا۔ جولائی تا ستمبر تجارتی خسارہ بڑھ کر 9 ارب 36 کروڑ 80 لاکھ ڈالر ہوگیا۔ گزشتہ مالی سال اسی مدت میں تجارتی خسارے کا حجم 7 ارب ڈالر تھا۔
رپورٹ کے مطابق موجودہ مالی سال کی پہلی سہہ ماہی میں تجارتی خسارے میں 2 ارب 32 کروڑ ڈالر کا اضافہ ہوگیا، برامدات 7 ارب 60 کروڑ جبکہ درآمدات تقریبا 17 ارب ڈالرتک پہنچ گئیں۔
مالی سال کی پہلی سہہ ماہی میں ملکی برآمدات 3.83 فیصد کمی سے 7 ارب 60 کروڑ ڈالر ریکارڈ کیا گیا، اس دوران درآمدات 14.39 فیصد اضافے سے 16 ارب 97 کروڑ ڈالر تک پہنچ گئیں۔
ادارہ شماریات کے مطابق ستمبر 2025 میں برآمدات 3.64 فیصد اضافے سے 2 ارب 50 کروڑ ڈالر رہیں۔ اگست 2025 میں برآمدات کا حجم 2 ارب 41 کروڑ 60 لاکھ ڈالر تھا۔
گزشتہ ماہ ستمبر 2024 کی نسبت برآمدات میں 11.71 فیصد کمی ریکارڈ کی گئی، گزشتہ سال ستمبر میں ملکی برآمدات کا حجم 2 ارب 83 کروڑ ڈالر سے زائد تھا، ستمبر 2025 میں غیر ملکی درآمدات کا حجم 5 ارب 84 کروڑ ڈالر سے تجاوز کر گیا۔
ستمبر 2025 میں تجارتی خسارہ 16.33 فیصد اضافے سے 3 ارب 34 کروڑ ڈالر رہا، ستمبر 2025 میں گزشتہ سال کی نسبت تجارتی خسارہ 46 فیصد اضافہ ریکارڈ کیا گیا۔
