انگلینڈ کے باکسنگ لیجنڈ اور سابق دو ڈویژن ورلڈ چیمپئن رکی ہیٹن 46 برس کی عمر میں انتقال کر گئے ہیں، ورلڈ باکسنگ ایسوسی ایشن (ڈبلیو بی اے )نے رکی ہیٹن کے انتقال کی تصدیق کردی ہے۔
ہٹ مین کے نام سے مشہور رکی ہیٹن نے اپنے شاندار کیریئر میں ڈبلیو بی اے ،آئی بی او اور آئی بی ایف لائٹ ویلٹر ویٹ ٹائٹلز کے ساتھ ساتھ ڈبلیو بی اے ویلٹر ویٹ کا عالمی اعزاز بھی اپنے نام کیا تھا۔ رکی ہیٹن نے 2012میں باکسنگ کو خیر باد کہا دیا تھا، تاہم رواں سال دبئی میں ایک نمائشی فائٹ کے لیے واپسی کی تیاری کر رہے تھے۔
گریٹر مانچسٹر پولیس کے مطابق اتوار کی صبح ہائیڈ میں ایک مکان سے ان کی لاش ملی تھی۔رکی ہیٹن نے اپنے پروفیشنل کیریئر میں 48 میں سے 45 مقابلے جیتے ، ریٹائرمنٹ کے بعد وہ کئی بار ذہنی دباؤ، شراب نوشی اور منشیات کے باعث مشکلات کا شکار رہے اور خودکشی کی کوششوں کا بھی اعتراف کیا۔ 2016میں بی بی سی کو انٹرویو میں انہوں نے کہا تھا کہ میری زندگی شراب نوشی کے باعث پٹری سے اتر گئی تھی اور اسی نے مجھے نشے کی طرف دھکیل دیا، یہ سب ایک بے قابو ٹرین کی طرح تھا۔
ان کی سب سے یادگار فتح 2005میں ہوئی تھی جب انہوں نے آسٹریلوی باکسر کوستیا زو کو شکست دے کر آئی بی ایف لائٹ ویلٹر ویٹ ٹائٹل اپنے نام کیا تھا، اس کے بعد وہ اپنی پرانی فارم میں واپس نہ آ سکے۔ان کی موت پر برطانوی باکسر اور سابق چیمپئن عامر خان نے ایک جذباتی پیغام میں کہا،آج ہم نے ناصرف برطانیہ کے عظیم ترین باکسرز میں سے ایک کو کھو دیا بلکہ ایک دوست، ایک رہنما اور ایک فائٹر کو بھی کھو دیا، رکی ہیٹن آپ ہمیشہ ہماری یادوں میں زندہ رہیں گے۔
