یمن میں قائم گروپ حوثی کی وزارت صحت کے ترجمان انیس السباہی نے سوشل میڈیا پر بیان میں کہا کہ اسرائیلی فضائی حملوں کے نتیجے میں 35 شہری جاں بحق جبکہ 131 سے زائد زخمی ہو گئے ہیں، یہ تعداد حتمی نہیں ہے اور اس میں مزید اضافہ ہوسکتا ہے۔
الجزیرہ کے مطابق اسرائیلی طیاروں نے یمنی دارالحکومت صنعا پر شدید بمباری کی ہے جس کے نتیجے میں 35 افراد کے جاں بحق ہونے کی اطلاعات ہیں، حملے میں اسرائیل کے 10 طیاروں نے حصہ لیا اور 30 سے زائد بم اور میزائل داغے گئے۔اسرائیلی طیاروں نے صنعا میں مختلف مقامات کو نشانہ بنایا جن میں فوجی کیمپ، ایندھن کے ذخائر اور وزارت دفاع کی عمارت شامل ہیں۔
اسرائیلی وزیر دفاع نے دعویٰ کیا ہے کہ یہ حملے آپریشن رنگنگ بیلز کے تحت کیے گئے اور ان میں حوثیوں کو ایک اور دردناک دھچکا دیا گیا ہے۔اسرائیلی وزیر دفاع کا مزید کہنا تھا کہ اسرائیل کی پہنچ دور تک ہے اور شہریوں کو نشانہ بنانے والوں کو نہیں چھوڑیں گے۔
وزارت صحت یمن
یمن وزارت صحت نے بتایا کہ حملے دارالحکومت صنعاء اور صوبہ الجوف میں کیے گئے، ابتدائی اعداد و شمار کے مطابق ہلاکتوں کی تعداد میں اضافے کا خدشہ ہے کیونکہ ریسکیو ٹیمیں اب بھی ملبے تلے دبے افراد کو نکالنے کی کوشش کر رہی ہیں، وزارت نے کہا کہ فضائی حملوں میں شہری اور رہائشی علاقے نشانہ بنے، جن میں صنعاء کے التحریر محلے کے مکانات، شہر کے جنوب مغرب میں 60 فٹ روڈ پر ایک طبی سہولت اور الجوف کے دارالحکومت الحزم میں ایک سرکاری عمارت شامل ہیں۔ شہری دفاع کی ٹیمیں بمباری سے لگنے والی آگ بجھانے اور زندہ بچ جانے والوں کو نکالنے میں مصروف ہیں۔
اسرائیلی فوج کا بیان
اسرائیلی فوج کا کہنا ہے کہ اس کے جنگی طیاروں نے صنعاء اور الجوف میں حوثی اہداف پر بمباری کی، جن میں فوجی کیمپ، ایندھن کا ڈپو اور ایک میڈیا آفس شامل تھا۔
حوثی رد عمل
حوثی مسلح افواج نے حملوں کی تصدیق کرتے ہوئے کہا کہ فضائی دفاع نے کئی زمین سے فضا میں مار کرنے والے میزائل فائر کیے اور کچھ اسرائیلی طیاروں کو پیچھے ہٹنے پر مجبور کیا۔ حوثی زیر انتظام المسیرہ ٹی وی کے مطابق حملوں میں صنعاء کے جنوب مغرب میں ہیلتھ سیکٹر کی ایک طبی سہولت اور الجوف کے دارالحکومت الحزم میں مقامی حکومت کی عمارت کو نشانہ بنایا گیا۔
حوثی فوجی ترجمان یحییٰ سریع نے الزام لگایا کہ اسرائیل گروپ کو غزہ کی حمایت سے دستبردار کرنے کے لیے دباؤ ڈال رہا ہے، تاہم انہوں نے عہد کیا کہ غزہ پر اسرائیل کی جنگ رکنے تک اسرائیل کے خلاف کارروائیاں جاری رہیں گی۔ اسرائیل بارہا یمن پر بمباری کر چکا ہے، جس میں اہم ہوائی اڈہ بھی شامل ہے، جس سے شہری ہلاک اور بنیادی ڈھانچے کو نقصان پہنچا ہے۔
اسرائیلی وزیراعظم نیتن یاہو
اسرائیلی وزیر اعظم نیتن یاہو نے مزید حملوں کی دھمکی دیتے ہوئے کہا کہ آج یمن میں کیے گئے حملے چند روز قبل اسرائیل کے رامون ایئرپورٹ پر حوثی ڈرون حملے کے جواب میں تھے۔
