متحدہ عرب امارات کرکٹ ٹیم کے کپتان محمد وسیم نے بھارتی اسٹار بلے باز اور سابق کپتان روہت شرما کا اہم ٹی ٹوئنٹی ریکارڈ اپنے نام کرلیا۔
افغانستان کے خلاف شارجہ میں کھیلے گئے سہ ملکی سیریز کے میچ میں محمد وسیم نے شاندار بیٹنگ کرتے ہوئے ریکارڈ بک میں نئی انٹری دی اور انہوں نے صرف 37 گیندوں پر 67 رنز کی دھواں دھار اننگز کھیلی جس میں 6 چھکے اور 4 چوکے شامل تھے۔
اسی دوران وسیم نے روہت شرما کو پیچھے چھوڑتے ہوئے کپتان کی حیثیت سے سب سے زیادہ چھکے مارنے والے کھلاڑی کا اعزاز حاصل کرلیا۔
یو اے ای کے کپتان نے صرف 54 اننگز میں 110 چھکے جڑ دیے جبکہ روہت شرما نے 62 اننگز میں 105 چھکے مارے تھے۔
محمد وسیم نے اس کارکردگی کے ساتھ نیوزی لینڈ کے سابق اوپنر مارٹن گپٹل کو بھی پیچھے چھوڑ دیا اور ٹی ٹوئنٹی انٹرنیشنل کرکٹ میں سب سے زیادہ چھکے لگانے والے بلے بازوں کی فہرست میں دوسرے نمبر پر پہنچ گئے۔
اس وقت سب سے زیادہ چھکوں کا عالمی ریکارڈ اب بھی روہت شرما کے پاس ہے جنہوں نے 159 میچز میں 205 چھکے لگائے ہیں۔
دوسری جانب محمد وسیم 80 میچز میں 176 چھکے لگا کر دوسرے نمبر پر ہیں۔
