پنجاب کے مختلف ترقیاتی منصوبوں کے لیے 86 ارب روپے کے فنڈز منظور کر لیے گئے، لاہور کے مختلف علاقوں میں انڈر گراؤنڈ پارکنگ کے لیے 24 ارب 69 کروڑ کی منظوری دی گئی ۔
تفصیلات کے مطابق ناصر باغ ، موچی گیٹ، شیراں والا گیٹ اور ٹیکسالی گیٹ میں انڈر گراؤنڈ پارکنگ تعمیر کی جائے گی، مختلف شہروں میں سیوریج اور طوفانی بارشوں کے ڈرینج سسٹم کی تعمیر کے لیے 54 ارب روپے منظور کیئے گئے ہیں۔
راولپنڈی کے مختلف علاقوں میں انڈر پاسز کی تعمیر کے لیے 6 ارب ، پنجاب واٹر ریسورس مینجمنٹ میں پروجیکٹ ریڈینس فائنانسنگ فیسیلٹی کے لیے ایک ارب 27 کروڑ ، بورے والا میں سیوریج سسٹم اور فٹ پاتھ کی تعمیر کے لیے 8ارب 19 کروڑ روپے ، بھوربن میں 50 بستروں کے اسپتال کی تعمیر کے لیے فیزیبلٹی سٹڈی کے لیے ایک کروڑ 39 لاکھ کے فنڈز منظور کر لیئے گئے ۔
فنڈز کی منظوری صوبائی ترقیاتی ورکنگ پارٹی نے دی، اجلاس کی صدارت چیئرمین پلاننگ اینڈ ڈویلپمنٹ بورڈ ڈاکٹر نعیم رؤف نے کی۔
