سندھ کابینہ نے مختلف شعبوں کیلئے زمین الاٹ کرنے کی منظوری دے دی ہے، سندھ ہائیکورٹ بار، سندھ یونیورسٹی ٹھٹھہ کیمپس اور نادرا سمیت دیگر ادارے شامل ہیں۔
سندھ کابینہ اجلاس کے منٹس جاری کردیے گئے، صوبائی کابینہ نے مختلف شعبوں کو 700 ایکڑ سے زائد زمین الاٹ کرنے کی منظوری دیدی۔
رپورٹ کے مطابق سندھ ہائیکورٹ بار ایسوسی ایشن کراچی کو 600 ایکڑ زمین الاٹ کرنے کی منظوری دی گئی ہے، بورڈ آف ریونیو کو زمین کی مارکیٹ ویلیو معلوم کرکے قیمت طے کرنے اور 5 برسوں کے دوران کراچی میں زمینوں کی الاٹمنٹ کی تفصیلات فراہم کرنے کی بھی ہدایت کی گئی ہے۔
سندھ کابینہ کی جانب سے سندھ یونیورسٹی ٹھٹھہ کیمپس کیلئے 100 ایکڑ، علامہ اقبال اوپن یونیورسٹی حیدرآباد کیمپس کیلئے 2 ایکڑ زمین الاٹ کرنے کی منظوری دی گئی ہے۔
سندھ کابینہ نے پنوعاقل میں 30 ایکڑ زمین کا ٹائٹل زرعی زمین میں تبدیل کرنے کی بھی منظوری دیدی تاہم سینئر ممبر بورڈ آف ریونیو کی جانب سے مشورہ دیا گیا ہے کہ مستقبل میں کسی زمین کا ٹائٹل تبدیل نہ کریں۔
صوبائی کابینہ نے نادرا ریجنل ہیڈ آفس کیلئے 2 ایکڑ زمین الاٹ کرنے کی بھی منظوری دے دی۔
