افغانستان کرکٹ بورڈ (اے سی بی) نے پاکستان اور متحدہ عرب امارات (یو اے ای) کے خلاف ٹی ٹوئنٹی ٹرائی نیشن سیریز کے لیے 17 رکنی اسکواڈ کا اعلان کردیا۔
شیڈول کے مطابق ٹرائی نیشن سیریز 29 اگست سے 7 ستمبر تک شارجہ میں کھیلی جائے گی۔
اسٹار آل راؤنڈر اور اسپنر راشد خان ٹیم کی قیادت کریں گے جبکہ اعلان کردہ اسکواڈ میں صرف ایک تبدیلی کی گئی ہے اور فاسٹ بولر نوین الحق کی جگہ ابھرتے ہوئے پیسر عبداللہ احمدزئی کو شامل کیا گیا ہے۔
عبداللہ احمدزئی ، فضل الحق فاروقی، فرید ملک اور کریم جنت کے ساتھ افغانستان کے فاسٹ بولنگ اٹیک کا حصہ ہوں گے۔
اسپن اٹیک کی قیادت کپتان راشد خان خود کریں گے جبکہ ان کا ساتھ محمد نبی، مجیب الرحمٰن، نور احمد اور اے ایم غضنفر دیں گے۔
بیٹنگ لائن اپ میں رحمان اللہ گرباز اور ابراہیم زدران کے علاوہ درویش رسولی، محمد اسحاق اور صدیق اللہ اٹل شامل ہیں۔
افغانستان اپنی مہم کا آغاز 29 اگست کو پاکستان کے خلاف افتتاحی میچ سے کرے گا جبکہ یکم ستمبر کو میزبان یو اے ای کے مدمقابل ہوگا۔
افغان اسکواڈ:
راشد خان (کپتان)، رحمان اللہ گرباز، ابراہیم زدران، صدیق اللہ اٹل، درویش رسولی، عظمت اللہ عمرزئی، محمد اسحاق، گلبدین نائب، محمد نبی، کریم جنت، شرف الدین اشرف، نور احمد، مجیب الرحمٰن، اے ایم غضنفر، عبداللہ احمدزئی، فرید احمد ملک اور فضل الحق فاروقی۔
