چینی وزیر خارجہ وانگ ژی نے کہا ہے کہ پاکستانی فوج قومی استحکام کا ستون اور پاک ، چین دوستی و تعاون کی مضبوط محافظ ہے۔
چینی وزیر خارجہ وانگ ژی کی فیلڈ مارشل عاصم منیرسے ہونے والی اہم ملاقات پر چینی وزارت خارجہ کا بیان سامنے آیا ہے جس کے مطابق ان کا کہنا تھا کہ پاکستانی فوج نے ہمیشہ دونوں ممالک کی قیادت کے اہم اتفاق رائے پر عملدرآمد کی بھرپور حمایت کی ہے۔
وانگ ژی کا کہنا تھا کہ غیر یقینی حالات میں پاک، چین تعلقات کو فروغ دینا علاقائی امن واستحکام کیلئے نہایت سودمند ہے اور چین نے ہمیشہ اپنی پڑوسی سفارت کاری میں پاکستان کو اولین ترجیح دی ہے۔
لازمی پڑھیں۔ چینی وزیر خارجہ کی آرمی چیف سے ملاقات، اہم امور پر تبادلہ خیال
چینی وزیر خارجہ کا کہنا تھا کہ وقت کے کڑے امتحانات کے باوجود پاک، چین تعلقات مزید مضبوط ہوئے ہیں اور دونوں ممالک ایک مضبوط روایتی دوستی قائم کر چکے ہیں۔
انہوں نے عزم ظاہر کیا کہ چین پاکستان کی علاقائی سالمیت اور قومی سلامتی کے تحفظ میں بھرپور تعاون جاری رکھے گا۔
وانگ ژی کا مزید کہنا تھا کہ چین عالمی امور میں پاکستان کے بڑے کردار کا خیرمقدم کرتا ہے۔
دوسری جانب فیلڈ مارشل عاصم منیر کا کہنا تھا کہ چین پاکستان کا "آہنی دوست" ہے اور دونوں ممالک ہمیشہ دکھ سکھ میں شریک رہے ہیں جبکہ پاک، چین اسٹریٹجک شراکت داری چٹان کی طرح مضبوط ہے اور چین کےساتھ دوستانہ تعلقات قائم رکھنا پورے پاکستانی قوم کا متفقہ موقف ہے۔
فیلڈ مارشل عاصم منیر نے پاکستان کی معاشی اور سماجی ترقی میں قیمتی تعاون پر چینی قیادت سے اظہار تشکر بھی کیا۔
جنرل عاصم منیر کا کہنا تھا کہ پاکستانی فوج انسداد دہشتگردی اور سیکیورٹی تعاون کو فعال طور پر فروغ دینے کیلئے تیار ہے اور پاکستان میں چینی اہلکاروں ، منصوبوں اور اداروں کی حفاظت یقینی بنانے کی کوشش جاری رہے گی۔
ان کا مزید کہنا تھا کہ پاک ، چین دوستی مزید مستحکم بنانے کیلئے اقدامات اور ترقی کی راہ پر سفر جاری رکھا جائے گا۔
