پاکستان کی معروف اداکارہ اسما عباس کا واٹس ایپ اکاؤنٹ ہیک ہوگیا۔
اداکارہ اسما عباس کا واٹس ایپ اکاؤنٹ ہیک ہونے کا انکشاف ان کی بہن اور لیجنڈ اداکارہ بشریٰ انصاری نے اتوار کے روز انسٹاگرام پر ایک اسکرین شاٹ شیئر کرتے ہوئے کیا۔
اسکرین شاٹ میں دیکھا جا سکتا ہے کہ ہیکر نے اسما عباس کے نام سے ایک شخص ابراہیم سے 10 لاکھ روپے ادھار مانگے۔
بشریٰ انصاری نے اپنی پوسٹ میں لکھا کہ "براہِ کرم اس قسم کے پیغامات پر بھروسہ نہ کریں"۔
دوسری جانب اسما عباس نے بھی انسٹاگرام پر ایک ویڈیو شیئر کی جس میں انہوں نے بتایا کہ ان کے نمبر سے لوگوں کو پیغامات بھیج کر پیسوں کا مطالبہ کیا جا رہا ہے۔
View this post on Instagram
انہوں نے لوگوں سے اپیل کی کہ ایسے پیغامات کو نظر انداز کریں۔
اسما عباس نے بتایا کہ واٹس ایپ ہیک ہونے کی وجہ ایک فون کال تھی جس میں ان سے ایک پارسل کی ترسیل کے حوالے سے واٹس ایپ پر موصول ہونے والا کوڈ مانگا گیا۔
انہوں نے بتایا کہ ان کی بیٹی زارا نے کچھ چیزیں بھیجی تھیں اور انہیں لگا کہ بارشوں کی وجہ سے پارسل تاخیر سے پہنچا ہے۔
کوڈ بتانے کے فوراً بعد ان کا واٹس ایپ اکاؤنٹ ہیک ہوگیا۔
سینئر اداکارہ نے کہا کہ یہ رجحان پاکستان میں عام ہوتا جا رہا ہے کہ واٹس ایپ ہیک کر کے جاننے والوں سے پیسے مانگے جاتے ہیں۔
انہوں نے اس پریشانی کی وجہ سے اپنے دوستوں اور عزیزوں سے معذرت بھی کی۔
اسما عباس نے لوگوں سے گزارش کی کہ وہ اس طرح کے دھوکہ دہی والے پیغامات سے محتاط رہیں اور کسی کو بھی کوڈ یا ذاتی معلومات شیئر نہ کریں۔
