وزیراعلیٰ پنجاب مریم نوازنے ٹوکیو میں ہنڈا کمپنی کے ہیڈکوارٹر کا دورہ کیا جس دوران ہنڈا کمپنی ایگزیکٹو وائس پریزیڈنٹ نوریا کایہارا سے ملاقات کی جس دوران اسٹریٹجک تعاون بڑھانے،الیکٹرک گاڑیوں کی مقامی پیداوار اور اسمبلنگ کے امور پر تبادلہ خیال کیا گیا ۔
پنجاب حکومت اور ہنڈا کمپنی کے درمیان اسٹریٹجک تعاون ، الیکٹرک گاڑیوں کی مقامی پیداوار اور اسمبلنگ کے امور پر تبادلہ خیال کیا گیا ۔ نوجوانوں کو اس شعبے میں ہنرمند بنانے کے لئے جاپان بالخصوص ہنڈا کے تجربات سے فائدہ اٹھانے پر اتفاق کیا ۔ مریم نواز نے حکومت پنجاب کے پندرہ الیکٹرک بسوں کے لئے نجی شعبے کے اشتراک سے ای وی ڈپو قائم کرنے سے متعلق آگاہ کیا ۔
وزیراعلی پنجاب نے کہا کہ پنجاب میں بجلی سے چلنے والی گاڑیوں کے کلچر کے فروغ کے لئے ہنڈا کے تعاون کا خیر مقدم کریں گے ۔ پنجاب میں الیکٹرک گاڑیوں کی سب سے بڑی مارکیٹ بننے کا پوٹینشل ہے ۔ انہوں نے کہا کہ پنجاب اسکلڈ لیبر کے ساتھ الیکٹرک گاڑیوں کی اسمبلنگ اور مینوفیکچرنگ کے لئے آئیڈیل مقام ہے ۔ پنجاب کے شہری اور نیم شہری علاقوں میں الیکٹرک گاڑیوں اور بائیکس کے لئے بیٹری چارجنگ انفراسٹرکچر قائم کرنا چاہتے ہیں۔
اسٹیٹ آف دی آرٹ وہیکل ٹیسٹنگ لیب کے لئے ہنڈا کمپنی کے اشتراک کا خیر مقدم کریں گے ۔ ان کا کہنا تھا کہ پنجاب حکومت غیر ملکی سرمایہ کاروں کو بہترین مراعات فراہم کر رہی ہے ۔ لاہور اور راولپنڈی کے درمیان ہائی اسپیڈ ٹرین کے ذریعے نئے دور کا آغاز کریں گے ۔ راولپنڈی سے مری کے لئے ٹورسٹ گلاس ٹرین پراجیکٹ سے سیاحت کو فروغ ملے گا ۔ ہنڈا کمپنی کے نائب صدر نے وزیراعلی پنجاب مریم نواز کا خیرمقدم کیا اور صوبے کی ترقی کے وژن و جذبے کو سراہا۔
