بھارت کیخلاف شاندار فتح کے جشن معرکہ حق کے موقع پر 75 روپے کا یادگاری سکہ جاری کردیا گیا۔
اسٹیٹ بینک آف پاکستان کے مطابق وفاقی حکومت نے جشن معرکہ حق کے موقع پر 75 روپے کا یادگاری سکہ جاری کردی، سکہ مسلح افواج کی بہادری کو خراج تحسین پیش کرنے کیلئے جاری کیا گیا۔
مرکزی بینک کا کہنا ہے کہ یادگاری سکے میں پیتل اور تانبہ 79 فیصد، زنک 20 فیصد اور نکل ایک فیصد شامل کیا گیا ہے، یادگاری سکے کا قطر 30 ملی میٹر اور وزن 13.5 گرام ہے۔
اسٹیٹ بینک کے مطابق سکّے کے سامنے کے رخ پر وسط میں بڑھتا ہوا ہلال اور پانچ کناروں والا ابھرتا ہوا ستارہ ہے، ستارے اور ہلال کے اوپر سکّے کے کنارے کے ساتھ ساتھ اردو میں ’’اسلامی جمہوریہ پاکستان‘‘ کے الفاظ کندہ ہیں
رپورٹ کے مطابق سکّے کے بالائی کناروں پر اردو میں ’’پاکستان ہمیشہ زندہ باد‘‘ رقم ہے، سکّے کے پچھلے رخ پر (دائیں اور بائیں جانب ) دو لڑاکا طیارے، بحری جہاز، ملٹی پل راکٹ لانچر سسٹم ابھرے ہوئے دکھائی دیتے ہیں۔
مرکزی بینک کا کہنا ہے کہ سکّہ اسٹیٹ بینک کے فیلڈ دفاتر کے ایکسچینج کاؤنٹرز پر آج سے دستیاب ہے۔
