عراق میں کلورین گیس کی لیکج کے باعث 600 زائرین کی حالت غیر ہو گئی جن کو اسپتال میں داخل کرنا پڑا ہے۔ یہ واقعہ نجف اور کربلا کے درمیان راستے پر رات کو پیش آیا۔
عالمی خبر رساں ایجنسی کے مطابق حکام نے بتایا کہ عراق میں 600 سے زائد زائرین کو سانس لینے میں دشواری کی وجہ سے کچھ وقت کے لیے اسپتال میں داخل کرایا گیا تھا کیونکہ وہ پانی کی صفائی کرنے والے اسٹیشن پر کلورین کے اخراج کے نتیجے میں متاثر ہوئے تھے۔
ایک مختصر بیان میں عراق کی وزارت صحت نے کہا کہ ’کربلا میں کلورین گیس کے اخراج کے بعد دم گھٹنے کے 621 کیسز ریکارڈ کیے گئے ہیں۔ بیان کے مطابق تمام متاثرین کو ضروری دیکھ بھال ملی اور طبی معائنے کے بعد اچھی صحت کے ساتھ اسپتال سے ڈسچارج کیا گیا۔
زائرین کی حفاظت پر مامور سیکیورٹی فورسز نے کہا کہ یہ واقعہ کربلا نجف روڈ پر واقع واٹر اسٹیشن سے کلورین کے اخراج کی وجہ سے پیش آیا۔
واضح رہے کہ کئی دہائیوں سے جاری تنازعات اور بدعنوانی کی وجہ سے عراق کا زیادہ تر بنیادی ڈھانچہ تباہی کا شکار ہے، اور حفاظتی معیار کی پابندی نہ ہونے کے باعث اس طرح کے واقعات رونما ہوتے رہتے ہیں۔
