جنوبی لبنان میں اسلحہ ڈپو کا معائنہ کرنے اور اس میں موجود سامان کو تلف کرنے کے دوران دھماکے میں 6 لبنانی فوجی اہلکار جاں بحق ہو گئے۔
غیرملکی میڈیا کے مطابق فوجی اہلکار حزب اللہ کے ایک مرکز سے گولہ بارود منتقل کررہے تھے کہ دھماکا ہوا۔
یاد رہے کہ اسرائیل اور حزب اللہ کے درمیان ہونے والی جنگ بندی کے بعد لبنانی فورسز کو جنوبی لبنان میں تعینات کیا جا رہا ہے اور حزب اللہ کو غیر مسلح اور اس کے انفرا سٹرکچر کو ختم کیا جا رہا ہے۔ یہ واقعہ اسی فیصلے پر عملدرآمد کے دوران پیش آیا ہے۔
سعودی عرب نے دھماکے کے متاثرین کے اہل خانہ سے تعزیت اورلبنانی حکومت اور عوام کے ساتھ یک جہتی کا اظہار کیا ہے۔
سعودی وزارت خارجہ کی طرف سے جاری بیان میں لبنانی حکومت کی خود مختاری کو پورے ملک تک بڑھانے، سلامتی اور استحکام کو یقینی بنانے، لبنان اور اس کے عوام کی خوشحالی میں کردار کے حوالے سے لبنانی فوج کی کوششوں کی تعریف کی گئی ہے۔
