مصنوعی ذہانت کی معروف کمپنی ’’اوپن اے آئی‘‘ نے دو نئے اوپن سورس اے آئی ماڈلز متعارف کرا دیئے۔
عالمی خبر ایجنسی کے مطابق اوپن اے آئی نے دو نئے "اوپن” اے آئی ماڈلز لانچ کرنے کا اعلان کیا ہے، جنہیں صارفین اپنی مرضی کے مطابق ترتیب دے کر مقامی سطح پر چلا سکتے ہیں۔
یہ ماڈلز اوپن ویٹ لینگویج ماڈلز کہلاتے ہیں، جو صارفین کو ماڈل کے اندرونی پیرامیٹرز تک رسائی دیتے ہیں تاکہ انہیں اپنی مخصوص ضروریات کے مطابق ڈھالا جا سکے جو کہ کمپنی کے معروف بند ماڈل چیٹ جی پی ٹی کے برخلاف ہے۔
ایسے ماڈلز عام طور پر وہ کمپنیاں استعمال کرتی ہیں جو اے آئی کو اپنے سرورز پر مخصوص کاموں کے لیے مقامی سطح پر تعینات کرتی ہیں۔ اوپن اے آئی نے یہ وضاحت نہیں کی کہ ان نئے ماڈلز کی تربیت کے لیے کن ڈیٹا سیٹس کا استعمال کیا گیا۔
یہ پیشرفت اوپن اے آئی کے ماڈلز کو مختلف قسم کے ہارڈویئر پر قابلِ استعمال بناتی ہے۔ دیگر ٹیکسٹ جنریٹنگ اے آئی ٹولز کی طرح، یہ دونوں ماڈلز بھی کوڈ لکھنے، تحقیق کرنے اور مختلف آن لائن ڈیٹا تک رسائی کے ذریعے جوابات فراہم کرنے کی صلاحیت رکھتے ہیں۔
