پاکستان ہاکی ٹیم کے کھلاڑیوں نے ڈیلی الاؤنس کا معاملہ پھر اٹھادیا، صرف ڈومیسٹک ڈیلی الاؤنس کی ادائیگی کافی نہیں، انٹرنیشنل ڈیلی الاؤنس بھی ادا کیے جائیں، گھر چلانا مشکل ہورہا ہے۔
پاکستان ہاکی ٹیم کے کھلاڑیوں کے ڈیلی الاؤنس کا معاملہ ایک بار پھر سر اٹھانے لگا۔ ذرائع کے مطابق قومی ہاکی ٹیم کے کھلاڑی صرف ڈومیسٹک ڈیلی الاؤنس کی ادائیگی سے ناخوش ہیں، ہاکی ٹیم کے کھلاڑی تاحال انٹرنیشنل ڈیلی الاؤنس کے منتظر ہیں۔
کھلاڑیوں نے فیڈریشن سے شکوہ کیا ہے کہ گھر کا نظام چلانا مشکل ہے، ڈومیسٹک ڈیلی الاؤنس سے کیا بنے گا، ایف آئی ایچ نیشنز کپ ختم ہوئے ڈیڑھ ماہ ہوچکا، ڈیلی الاؤنس نہیں ملا۔
کھلاڑیوں کا کہنا ہے کہ ایونٹس میں شرکت بہت ضروری ہے، ہم دل و جان سے حاضر ہیں لیکن ہمارے گھر بھی ہیں۔
پاکستان ہاکی فیڈریشن کے صدر طارق بگٹی نے ڈومیسٹک الاؤنس کلئیر کرنے کا بتایا۔ طارق بگٹی کا کہنا تھا کہ نیشنز کپ سے قبل کھلاڑیوں کو بتادیا تھا کہ جمع پونجی خرچ کرکے جارہے ہیں۔
انہوں نے مزید کہا کہ مشکل وقت ضرور ہے، ابھی پیسے نہیں ہیں، ڈومیسٹک ڈیلیز کلیئر کردیئے ہیں، باقی بھی ہوجائیں گے۔
واضح رہے کہ ہاکی کھلاڑیوں کو ڈومیسٹک کا 3 ہزار روپے ڈیلی جبکہ انٹرنیشنل کا 30 ہزار روپے ڈیلی الاؤنس ملتا ہے۔
