آئی ایس پی آر سمر انٹرن شپ 2025ء میں شامل خیبرپختونخوا کی جامعات کے طلبہ و طالبات نے قلعہ بالا حصار کا دورہ کیا، طلباء کو قلعے کے تاریخی پس منظر اور ایف سی خیبرپختونخوا نارتھ کی امن و ترقی کیلئے کاوشوں پر تفصیلی بریفنگ دی گئی۔
فرنٹیئر کور خیبرپختونخوا نارتھ کے حکام نے طلبہ و طالبات کے امن وامان، سیکیورٹی اور ترقیاتی منصوبوں کے بارے میں سوالات کے تفصیلی جوابات دیئے۔
طلباء نے بالا حصار میوزیم میں آویزاں تاریخی ادوار کی بہترین منظر کشی، شہداء اور ثقافتی گیلری میں بھرپور دلچسپی لی، پاک فوج اور فرنٹیئر کور خیبرپختونخوا نارتھ کے غازیوں اور شہداء کو زبردست خراج تحسین پیش کیا۔
پشاور یونیورسٹی کی طالبہ حورالعین نے کہا کہ وطن کے دفاع میں پاک فوج اور ایف سی خیبرپختونخوا نارتھ کے بہادر جوانوں کا خون شامل ہے، جو ہر خطرے سے بے خوف وطن کے دفاع کیلئے کھڑے ہیں۔
سیدہ فضا علی کا کہنا تھا کہ بالا حصار کی تاریخ فرنٹیئر کور خیبرپختونخوا نارتھ کی شجاعت اور بہادری کی داستانوں سے بھری پڑی ہے۔ طالبہ ہمنہ شہزاد نے کہا آج کے دورے سے معلوم ہوا کہ ایف سی ناصرف دفاع بلکہ عوام کی ترقی و خوشحالی کیلے سرگرم عمل ہے۔
لائبہ حبیب کا کہنا تھا کہ دورے سے ہمیں بالا حصار کی تاریخ جاننے اور دیکھنے کا عملی موقع ملا جو ہمارے لیے باعث فخر ہے۔
