اسلام آباد کے علاقے ترنول میں فوڈ اتھارٹی نے بڑی کارروائی کرتے ہوئے 25 من گدھے کا گوشت برآمد کر لیا۔
ڈپٹی ڈائریکٹر فوڈ اتھارٹی ڈاکٹر طاہرہ صدیق کے مطابق کارروائی کے دوران 50 سے زائد زندہ گدھے بھی قبضے میں لے لیے گئے جبکہ برآمد کیا گیا گوشت تلف کرنے کا عمل جاری ہے۔
چھاپے کے دوران ایک غیر ملکی شہری کو موقع سے گرفتار کر کے پولیس کے حوالے کر دیا گیا جبکہ ڈائریکٹر فوڈ اتھارٹی نے ملوث افراد کے خلاف فوری مقدمہ درج کرنے کا حکم جاری کر دیا ہے۔
ڈاکٹر طاہرہ صدیق کا کہنا ہے کہ ابتدائی تحقیقات سے معلوم ہوا ہے کہ گدھے کا گوشت بیرون ملک سپلائی کیا جاتا تھا۔
تفتیش کا دائرہ کار وسیع کر دیا گیا ہے تاکہ معلوم کیا جا سکے کہ یہ گوشت کن کن علاقوں میں فراہم کیا جانا تھا۔
