لاہور، ساہیوال ، فیصل آباد ، سرگودھا ، گوجرانوالہ اور راولپنڈی کے تعلیمی بورڈز نے میٹرک کے سالانہ امتحانات میں پوزیشن ہولڈرز کا اعلان کردیا۔
لاہور بورڈ
قصور سے تعلق رکھنے والی حرم فاطمہ نے 1193 نمبر لے کر پہلی پوزیشن حاصل کی۔
ننکانہ صاحب کے نجی اسکول کی طالبہ نورالہدی اور ابوذر نے 1188 نمبر لے کر دوسری جبکہ لاہور کے نجی اسکول سے تعلق رکھنے والے محمد علی نے 1187 نمبر لے کر تیسری پوزیشن حاصل کی۔
مجموعی طور پر پہلی تینوں پوزیشن حاصل کرنے والے طلبا وطالبات کا تعلق سائنس گروپ سے ہے۔
ساہیوال بورڈ
ساہیوال تعلیمی بورڈ کے میٹرک سالانہ امتحانات 2025 کے نتائج کے مطابق 71,789 طلبہ و طالبات نے امتحان دیا جن میں سے 48,680 نے کامیابی حاصل کی، اور کامیابی کا تناسب 67.81 فیصد رہا۔
محمد فیضان نے 1185 نمبروں کے ساتھ بورڈ میں ٹاپ کیا جبکہ ام رومان نے 1187 نمبروں کے ساتھ دوسری پوزیشن حاصل کی اور فیضان فرید نے 1189 نمبروں کے ساتھ تیسری پوزیشن حاصل کی۔
فیصل آباد بورڈ
فیصل آباد تعلیمی بورڈ نے بھی میٹرک سالانہ امتحانات 2025 کے پوزیشن ہولڈرز کے ناموں کا اعلان کردیا۔
تینوں پوزیشنیں نجی اسکولوں کے طلبہ و طالبات نے حاصل کیں۔
محمد معیز قمر نے 1189 نمبروں کے ساتھ بورڈ میں ٹاپ کیا، ماہم ممتاز نے 1187 نمبروں کے ساتھ دوسری پوزیشن حاصل کی جبکہ میرب ورک نے 1186 نمبروں کے ساتھ تیسری پوزیشن حاصل کی۔
سرگودھا بورڈ
سرگودھا تعلیمی بورڈ نے بھی میٹرک امتحانات 2025 میں پوزیشن حاصل کرنے والے طلبہ و طالبات کے ناموں کا اعلان کیا جس کے مطابق نجی اسکول کی طالبہ مروہ سہیل نے 1187 نمبروں کے ساتھ پہلی پوزیشن حاصل کی۔
گورنمنٹ ہائی اسکول کمرمشانی کے طالب علم سراج خان نے 1186 نمبروں کے ساتھ دوسری پوزیشن حاصل کی اور اسد، مبین، اور منیب الرحمن نے 1184 نمبروں کے ساتھ مشترکہ طور پر تیسری پوزیشن حاصل کی۔
گوجرانوالہ بورڈ
گوجرانوالہ میں سائنس اور آرٹس گروپ میں 19 امیدواروں نے مختلف پوزیشنز حاصل کی جبکہ لڑکیوں نے مجموعی طور پر 7 پوزیشنز لیکر میدان مار لیا اور لڑکے مجموعی طور پر تین پوزیشنز حاصل کرسکے۔
3 امیدواروں شفایت رسول، علیشہ زیب اور فاطمہ شریز نے 1200 سے میں 1187 نمبر لیکر مجموعی طور پر پہلی پوزیشن حاصل کی۔
محمد موہد اور محمد عبداللہ نے 1186 نمبر لیکر مجموعی طور پر دوسری پوزیشن حاصل کی اور پانچ امیدواروں نے 1185 نمبر لیکر مجموعی طور پر تیسری پوزیشن حاصل کی۔
راولپنڈی بورڈ
راولپنڈی بورڈ میں لارنس کالج گھوڑا گلی کے طالبعلم محمد عثمان نے 1188 نمبرز لے کر پہلی پوزیشن حاصل کی جبکہ پنجاب گرلز اسکول تلہ گنگ کی طالبہ بسمہ علی 1177 نمبرز لے کر دوسرے نمبر پر رہیں اور بحریہ فاؤنڈیشن گرلز اسکول چکوال کی طالبہ مریم شہزادی نے 1175 نمبرز لے کر تیسری پوزیشن لی۔
