پاک بھارت جنگ کے بعد پاکستان ائیرپورٹس اتھارٹی کے بورڈ آف ڈائریکٹرز کا پہلا طویل اجلاس ہوا جس دوران تین ائیرپورٹس کی تعمیر نو،اسٹیٹ لاؤنجز کی حالت بہتر کرنے، ملازمین کو 30 فیصد عبوری ریلیف اور ریٹائرڈ ملازمین کی پنشن میں اضافے سے متعلق منظوری دے دی گئی۔
کراچی میں سیکریٹری دفاع کی زیر صدارت چھ گھنٹے طویل اجلاس ہوا ، سیکریٹری نے برطانیہ میں پروازوں کی بحالی پر بورڈ ارکان اور افسران کو سراہا ۔ ذرائع کے مطابق اجلاس میں بھارتی پروازوں کیلئے پاکستانی فضائی حدود کی بندش سے متعلق بریفنگ دی گئی ۔
بورڈ آف ڈائریکٹرز نے ڈیرہ اسماعیل خان،سکھر اور رحیم یارخان ائیر پورٹس کی تعمیر نو ، ایئر پورٹس پر اسٹیٹ لاؤنجز کی حالت بہتر کرنے اور ریٹائرڈ ملازمین کی پنشن میں بارہ سے پندرہ فیصد تک اضافے کی منظوری دی ۔ ذرائع کے مطابق اجلاس میں افسران اور اسٹاف کیڈر ملازمین کو تیس فیصد عبوری ریلیف دینے کا فیصلہ کیا گیا ۔ ریلیف یکم جولائی دوہزار چوبیس سے دینے کی منظوری دی گئی۔
