پاک افغان سرحد سے خوارج کی دراندازی کی کوشش ناکام بنادی، 5 مبینہ خودکش حملہ آوروں کو گرفتار کرلیا گیا، سیکیورٹی فورسز نے خفیہ اطلاع ملتے ہی 5 مختلف مقامات پر ناکہ بندی لگا کر کارروائی کی، گرفتار حملہ آور افغان شہری ہیں، جن کے پاس شناختی کارڈ بھی موجود ہیں، 23 مارچ سے 4 جولائی کے درمیان دراندازی کی کوشش میں 117 خوارج مارے جاچکے ہیں۔
سیکیورٹی ذرائع کے مطابق پاک افغان سرحد سے خوارج کی دراندازی کی کوشش ناکام بنادی گئی، فورسز نے 5 مبینہ خودکش حملہ آور گرفتار کرلیے۔
سیکیورٹی ذرائع کے مطابق 17 جولائی کی شام 5 بجے خوارج نے پاک افغان سرحد سے دراندازی کی کوشش کی، سیکیورٹی فورسز نے اطلاع ملتے ہی 5 مختلف مقامات پر ناکہ بندی کی، شام 6 بج کر 25 منٹ پر خوارج سرحد سے پاکستانی حدود میں داخل ہوئے، دراندازی کے بعد خوارج نے عزیز خیل اور منڈی خیل کی سمت پیش قدمی کی۔
ذرائع کا کہنا ہے کہ سیکیورٹی فورسز کی بہترین حکمت عملی سے خوارج نے ہتھیار ڈال دیئے، گرفتار کیے گئے خوارج افغان شہری ہیں، 3 کے پاس افغان شناختی کارڈ بھی موجود ہیں۔
سیکیورٹی ذرائع کے مطابق گرفتار دہشتگردوں کی عمریں 15 سے 18 سال کے درمیان ہیں، تمام خوارج کو مزید تفتیش کیلئے نامعلوم مقام پر منتقل کردیا گیا ہے۔
سیکیورٹی ذرائع نے مزید بتایا کہ سرحدی علاقوں میں الرٹ جاری کرکے سرچ آپریشن شروع کردیا گیا ہے، یہ پہلا موقع نہیں کہ خوارج پاک افغان سرحد سے دراندازی کر رہے تھے۔
رپورٹ کے مطابق اس سے قبل شمالی وزیرستان میں سیکیورٹی فورسز نے 25 سے 27 اپریل کے دوران آپریشن میں 71 خوارج ہلاک کیے تھے جبکہ 4 جولائی کو بھارتی حمایت یافتہ خوارج کی پاک افغان سرحد پر دراندازی کی کوشش میں 30 خوارج ہلاک ہوئے تھے۔
سیکیورٹی ذرائع کے مطابق 23 مارچ 2025ء کو بھی افغان سرحد کے ذریعے دراندازی کی کوشش میں 16 خوارج جہنم واصل کیے گئے تھے، پاک افغان سرحد سے دراندازی سے دہشتگردی پھیلانے تک فتنہ الخوراج کو بھارت کی مکمل حمایت حاصل ہے۔
