افغان ای ویزا اسکینڈل میں اہم پیشرفت، وزارت داخلہ کے دو اہم افسران کو عہدوں سے ہٹا دیا گیا۔ ڈپٹی سیکریٹری ویزا سیکشن اور جوائنٹ سیکریٹری ایف آئی اے کے تبادلے کردیئے گئے، مبینہ طور پر دونوں افسران کے نام اسکینڈل میں آرہے تھے۔
افغان باشندوں کو غیرقانونی طور پر ای ویزا کے اجراء کے اسکینڈل میں اہم پیشرفت ہوئی ہے، وزارت داخلہ نے اپنے دو اہم افسران کو عہدوں سے ہٹادیا۔
رپورٹ کے مطابق ڈپٹی سیکریٹری ویزا سیکشن شیریں حنا اصغر کا تبادلہ کردیا گیا جبکہ شفقت علی چاچڑ کو نیا ڈپٹی سیکریٹری ویزا تعینات کیا گیا ہے۔
رپورٹ کے مطابق وزارت داخلہ کے جوائنٹ سیکریٹری ایف آئی اے سیکشن عدنان ارشد اولک کو بھی عہدے سے فارغ کردیا گیا، ان کی جگہ عاصم ایوب نئے جوائنٹ سیکریٹری ایف آئی اے تعینات کیے گئے ہیں۔
وزرات داخلہ نے نئی تقرریوں کا باقاعدہ نوٹیفکیشن جاری کردیا۔ رپورٹ کے مطابق اب تک ای ویزا اسیکنڈل میں 4 ملزمان گرفتار کئے جاچکے ہیں، رشوت مانگنے والے ایک سب انسپکٹر اور کانسٹیبل بھی گرفتار ملزمان میں شامل ہیں۔
