ویسٹ انڈیز کے جارح مزاج آل راؤنڈر آندرے رسل نے انٹرنیشنل کرکٹ سے ریٹائرمنٹ کا فیصلہ کر لیا۔
رپورٹس کے مطابق آندرے رسل رواں ماہ آسٹریلیا کے خلاف ویسٹ انڈیز میں ہونے والی پانچ ٹی ٹوئنٹی میچوں کی سیریز کے ابتدائی دو میچز کھیلنے کے بعد کرکٹ کو خیرباد کہیں گے۔
یہ سیریز 20 سے 28 جولائی 2025 تک شیڈول ہے اور رسل اپنا آخری انٹرنیشنل میچ 22 جولائی کو اپنے ہوم گراؤنڈ جمیکا کے سبینا پارک میں کھیلیں گے۔
ویسٹ انڈیز کرکٹ بورڈ نے رسل کی خدمات کو خراج تحسین پیش کرتے ہوئے کہا کہ "15 سال تک آپ نے ویسٹ انڈیز کی عزت اور وقار کے لیے پرجوش انداز میں کھیلا، آپ کا شکریہ!"۔
View this post on Instagram
37 سالہ رسل نے ویسٹ انڈیز کی نمائندگی کرتے ہوئے ایک ٹیسٹ، 56 ون ڈے اور 84 ٹی ٹوئنٹی میچز کھیلے۔
وہ 2012 اور 2016 کے ٹی ٹوئنٹی ورلڈ کپ جیتنے والی ویسٹ انڈین ٹیم کا اہم حصہ تھے۔
2019 کے بعد سے رسل نے صرف ٹی ٹوئنٹی فارمیٹ میں حصہ لیا اور اب وہ 2026 کے ٹی ٹوئنٹی ورلڈ کپ سے ایک سال قبل انٹرنیشنل کرکٹ سے کنارہ کشی اختیار کر رہے ہیں۔
