لبنان کے مشرقی علاقے وادی بقاع میں ایک اسرائیلی حملے میں 12 افراد شہید ہوگئے۔
خبر ایجنسی کے مطابق لبنان کے صوبے بعلبک ھرمل کے گورنر کا کہنا ہے کہ ملک کی مشرقی وادی بقاع میں ایک اسرائیلی حملے میں ایک ہی خاندان کے 5 افراد سمیت 7 شامی شہری اور تین لبنانی شہری شہید ہوگئے۔
گورنر بشیر خضر کی طرف سے سوشل میڈیا پر جاری پوسٹ کے مطابق اس سے قبل دو اموات کی اطلاعات بعلبک ھرمل صوبے کے علاقے شمسطار سے بھی آئی تھیں۔ لبنان کی طرف سے اسرائیلی حملے کو جنگ بندی کے معاہدے اور لبنان کی خودمختاری کی خلاف ورزی قرار دیا گیا ہے۔
اسرائیلی فوج کا کہنا ہے کہ اس نے لبنانی مسلح گروہ حزب اللہ کے عسکری مقامات اور اس کی رضوان فورس کی تربیت گاہوں کو نشانہ بنایا ہے۔
اسرائیلی مسلح افواج (آئی ڈی ایف) کے ترجمان نے سوشل میڈیا پلیٹ فارم ایکس پر لکھا کہ منگل کو کئے گئے حملے میں حزب اللہ کے متعدد اہداف کو نشانہ بنایا گیا ہے۔ان حملوں میں رضوان فورس سے منسلک مقامات کو بھی نشانہ بنایا گیا ہے جو حزب اللہ کا ایلیٹ کمانڈو یونٹ ہے۔
