وفاقی وزیر داخلہ محسن نقوی اپنے سرکاری دورہ ایران کے دوران مشہد پہنچ گئے جہاں صوبہ خراسان کے گورنر جنرل غلام حسین مظفری نے مشہد انٹرنیشنل ایئرپورٹ پر ان کا پرتپاک خیرمقدم کیا۔
دونوں رہنماؤں کے درمیان ملاقات میں دوطرفہ تعلقات اور باہمی دلچسپی کے امور پر تبادلہ خیال کیا گیا۔
گورنر جنرل غلام حسین مظفری نے کہا کہ محسن نقوی کی مشہد آمد ہمارے لیے باعث افتخار ہے۔
انہوں نے پاکستانی حکومت اور عوام کے خیرسگالی کے جذبات کی قدر کی اور کہا کہ جنگ کے دوران پاکستان نے ایران کے ساتھ ڈٹ کر حمایت کی اور بھائی ہونے کا ثبوت دیا۔
وفاقی وزیر داخلہ محسن نقوی نے کہا کہ ایرانی قیادت اور عوام نے جنگ کے دوران ہمت اور عزم کا بے مثال مظاہرہ کیا۔
انہوں نے زور دیا کہ پاکستان اپنے برادر ہمسایہ ملک ایران کے ساتھ ہمیشہ کھڑا رہا ہے اور کھڑا رہے گا۔
انہوں نے مشہد میں زائرین کے لیے ایرانی حکومت کے بہترین انتظامات کی تعریف کی اور کہا کہ سہ فریقی کانفرنس کے فیصلوں سے پاکستانی زائرین کو ایران اور عراق جانے میں مزید آسانیاں حاصل ہوں گی۔
محسن نقوی نے اپنے دورہ ایران کو انتہائی کامیاب قرار دیتے ہوئے کہا کہ انہیں ایران سے بہت محبت اور عزت ملی۔
انہوں نے تہران میں ہونے والی سہ ملکی کانفرنس میں شرکت کی، جس میں زائرین اور سرحدی مسائل کے حل کے لیے اہم فیصلے کیے گئے، جن سے پاکستانی زائرین کو سہولت ملے گی۔
اس ملاقات میں دونوں ممالک کے درمیان تعلقات کو مزید مضبوط بنانے اور زائرین کے مسائل کے حل کے لیے مشترکہ کوششوں پر اتفاق کیا گیا۔
