امریکی صدر نے یوکرین کیلئے مشروط دفاعی پیکیج کا اعلان کردیا، کہا کہ یوکرین کو ہتھیار ہم دیں گے، ادائیگی یورپ کرے گا۔ بی بی سی کو انٹرویو میں کہا کہ روسی صدر پیوٹن سے مایوس ہوں لیکن ناامید نہیں، کئی بار ایسا لگا کہ روس سے معاہدہ ہونے والا ہے۔
وائٹ ہاؤس میں امریکی صدر ڈونلڈ ٹرمپ اور نیٹو چیف مارک روٹے کی ملاقات میں یوکرین کو ہتھیار دینے کے معاملات طے پاگئے۔
ٹرمپ نے یوکرین کیلئے مشروط دفاعی پیکیج کا اعلان کردیا، کہا کہ ہتھیار ہم دیں گے، ادائیگی یورپ کرے گا۔
امریکی میڈیا کے مطابق ٹرمپ انتظامیہ یوکرین کو پیٹریاٹ میزائل سسٹم سمیت مہنگے ترین ہتھیاروں کی فراہمی پر تیار ہے، ان ہتھیاروں کی ادائیگی برطانیہ، جرمنی اور دیگر نیٹو ممالک کریں گے۔
صدر ٹرمپ نے روسی ہم منصب سے 50 دن میں جنگ ختم کرنے کا مطالبہ کردیا، یوکرینی صدر زیلسنکی نے امریکی صدر کو فون کرکے دفاعی پیکیج پر شکریہ ادا کیا۔
دوسری جانب امریکی صدر ڈونلڈ ٹرمپ نے بی بی سی کو انٹرویو دیتے ہوئے کہا کہ روسی صدر ولادیمیر پیوٹن سے مایوس ہوں لیکن پوری طرح ہاتھ کھڑے نہیں کیے، 4 بار ایسا لگا کہ روس کے ساتھ معاہدہ ہونے ہی والا ہے۔
ان کا کہنا ہے کہ ہر بار معاہدہ قریب آتے ہی روس کیف پر حملہ کرتا ہے، نیٹو اب غیر متعلق نہیں رہا، رکن ممالک اپنی ادائیگیاں خود کرتے ہیں، اپنے اوپر قاتلانہ حملے سے متعلق بہت کم سوچتا ہوں۔
