فرنٹیئر کانسٹیبلری کو ملک گیر فیڈرل فورس میں تبدیل کردیا گیا، صدر مملکت نے ایف سی ری آرگنائزیشن آرڈیننس 2025ء جاری کردیا۔ نوٹیفکیشن کے مطابق فیڈرل کانسٹیبلری کو چاروں صوبوں، اسلام آباد، آزاد کشمیر اور گلگت بلتستان میں بھی کام کرنے کا اختیار ہوگا۔
صدر مملکت آصف علی زرداری نے فرنٹیئر کانسٹیبلری کو ملک گیر فیڈرل فورس (فیڈرل کانسٹیبلری) میں تبدیل کرنے کا فرنٹیئر کانسٹیبلری ری آرگنائزیشن آرڈیننس 2025 جاری کردیا۔
آرڈیننس کے مطابق فرنٹیئر کانسٹیبلری اب فیڈرل کانسٹیبلری کہلائے گی، یہ ملک بھر میں ایف سی کا دائرہ اختیار بڑھانے کا آرڈیننس ہے، ایف سی ایکٹ 1915ء میں ترامیم کی منظوری کے بعد آرڈیننس جاری کیا گیا ہے۔
آرڈیننس میں مزید کہا گیا ہے کہ فیڈرل کانسٹیبلری چاروں صوبوں، اسلام آباد، آزاد کشمیر اور گلگت بلتستان میں کام کرنے کا اختیار رکھے گی، فیڈرل کانسٹیبلری کا انسپکٹر جنرل وفاقی حکومت تعینات کرے گی، فیڈرل کانسٹیبلری سے متعلق قواعد بنائے جائیں گے ہر ڈویژن میں ایک ونگ کمانڈر تعینات کیا جائے گا۔
نوٹیفکیشن کے مطابق ڈویژنل ونگ کمانڈر کا رینک ڈپٹی انسپکٹر جنرل کے برابر ہوگا، وفاقی حکومت لاء اینڈ آرڈر کے حصول کیلئے وفاقی ریزرو فورس بھرتی کرسکے گی، فیڈرل کانسٹیبلری کی ذمہ داری فسادات کنٹرول، داخلی سیکیورٹی، کاؤنٹر ٹیررازم اور تحفظ کی ہوگی۔
رپورٹ کے مطابق فیڈرل کانسٹیبلری کی دو ڈویژن ہوں گی، ایک سیکیورٹی ڈویژن اور دوسری فیڈرل ریزرو ڈویژن، فیڈرل کانسٹیبلری میں بھرتی کیلئے ملک بھر میں دفاتر قائم کیے جائیں گے، تنظیم نو فریم ورک کے تحت فیڈرل کانسٹیبلری کی کمانڈ پولیس سروس آف پاکستان کے افسران کریں گے۔
