وفاقی حکومت نے فرنٹیئر کانسٹیبلری (ایف سی) کو ملک گیر فیڈرل فورس میں تبدیل کرنے کا فیصلہ کرلیا۔
ذرائع کے مطابق فورس کا نام تبدیل کر کے "فیڈرل کانسٹیبلری" رکھا جائے گا جو چاروں صوبوں، اسلام آباد، گلگت بلتستان، اور آزاد جموں و کشمیر میں کام کرنے کی مجاز ہوگی۔
اس فیصلے پر عمل درآمد کے لیے وفاقی کابینہ کی جانب سے فرنٹیئر کانسٹیبلری ایکٹ 1915 میں ترامیم کی منظوری کے بعد ایک آرڈیننس جاری کیا جائے گا۔
ذرائع کا کہنا ہے کہ فیڈرل کانسٹیبلری کے قیام سے ملکی داخلی سلامتی اور امن و امان کے قیام میں خاطر خواہ مدد ملے گی۔
پہلے ایف سی میں صرف خیبر پختونخوا سے نوجوان بھرتی ہوتے تھے لیکن اب فیڈرل کانسٹیبلری میں پورے پاکستان سے نوجوانوں کی بھرتی ممکن ہوگی۔
اس نئی فورس کی کمانڈ پولیس سروس آف پاکستان (پی ایس پی) کے افسران کریں گے اور ملک بھر میں اس کے دفاتر قائم کیے جائیں گے۔
