رود کوہی سیلاب نے ضلع راجن پور میں شدید تباہی مچادی ہے اور طیب ڈرین میں دو مختلف مقامات پر شگاف پڑنے سے درجنوں دیہات زیر آب آگئے جبکہ سینکڑوں ایکڑ پر کھڑی تیار فصلیں ڈوب کر تباہ ہو گئیں۔
چک شکاری کے قریب نہر میں شگاف پڑنے سے بستی احمد خان دریشک سمیت کئی دیہات پانی کی زد میں آ گئے۔
دریائے سندھ کی سطح میں مسلسل اضافے کے باعث جام پور کے موضع ہیرو میں زمیندارہ حفاظتی بند ٹوٹنے سے موضع ہیرو، آدم گڑھ، ٹھل مہتم سمیت متعدد دیہات زیر آب آ گئے۔
متاثرہ علاقوں کے مکین اپنی مدد آپ کے تحت محفوظ مقامات پر نقل مکانی پر مجبور ہیں۔
ڈپٹی کمشنر راجن پور شفقت اللہ مشتاق نے بتایا کہ طیب ڈرین کے شگاف کو بند کرنے کے لیے محکمہ ایریگیشن اور محکمہ رود کوہی کی مشینری سرگرم عمل ہے۔
مزید بارشوں کے الرٹ کے پیش نظر سیلاب سے بچاؤ کے انتظامات مکمل کر لیے گئے ہیں۔
علاقہ مکینوں نے حکام سے فوری امداد اور حفاظتی بندوں کی مرمت کا مطالبہ کیا ہے جبکہ سیلاب سے متاثرہ افراد کو خوراک، خیموں اور طبی سہولیات کی اشد ضرورت ہے۔
