نائب وزیراعظم اسحاق ڈار نے چین کےوزیر خارجہ وانگ ژی سے ٹیلی فونک رابطہ کیا جس دوران امریکا اور ایران کے درمیان اسلام آباد مذاکرات کے حوالے سے تبادلہ خیال کیا گیا ۔ دونوں رہنماؤں نے قریبی رابطے میں رہنے پر اتفاق کیا ۔
ترجمان دفتر خارجہ کے مطابق چینی وزیر خارجہ نے خطے میں امن واستحکام کیلئے پاکستانی کوششوں پر مبارک باد دی ۔ پاکستان کے تعمیری سفارتی کردار کیلئے چین کی مسلسل حمایت کا اعادہ بھی کیا ۔ اسحاق ڈار نے مذاکرات اور سفارتکاری آگے بڑھانے کے مستقل عزم کو دہراتے ہوئے کہا بات چیت اور سفارت کاری ہی آگے بڑھنے کا واحد قابل عمل راستہ ہے ۔
دونوں رہنماؤں کے درمیان پاک چین پانچ نکاتی امن اقدامات پر بھی گفتگو ۔ کہا کہ مجوزہ امن اقدامات کا مقصد مسائل کے پرامن حل میں سہولت فراہم کرنا ہے ۔ نائب وزیراعظم کی اسلام آباد میں چینی سفیر جیانگ زائی ڈونگ سے بھی ملاقات ہوئی ۔ چینی سفیر نے امریکا ایران مذاکرات میں پاکستان کے کردار کی تعریف کی ۔ ملاقات میں پاکستان اور چین کے درمیان تعلقات کو مضبوط تر بنانے کے عزم کا اعادہ کیا گیا ۔
