کوئٹہ سے پاکستان کسٹمز کے دو اہلکاروں کو گرفتار کر لیا گیا ہے، جن پر ضبط شدہ چاندی کو سیسے کی اینٹوں سے تبدیل کرنے کا سنگین الزام ہے۔ یہ بات ایف بی آر کی جانب سے جاری اعلامیے میں بتائی گئی۔
اعلامیے کے مطابق ملزمان کو 688 کلو گرام ضبط شدہ چاندی لاہور منتقل کرنے کی ذمہ داری سونپی گئی تھی۔ اہلکاروں نے اسٹیٹ ویئر ہاؤس سے 36 سیل بند ڈبوں میں پیک چاندی اپنی تحویل میں لی اور اسے پاکستان منٹ لاہور منتقل کیا۔
لاہور میں دونوں افسران اور منٹ کے عملے کی موجودگی میں جب ڈبوں کو کھولا گیا تو حیران کن طور پر 688 کلو گرام میں سے 400 کلو چاندی جعلی نکلی۔ سیل بند ڈبوں میں چاندی کی جگہ سیسہ پایا گیا۔
ایف بی آر کے مطابق تحقیقات میں انکشاف ہوا کہ ملزمان نے دانستہ طور پر چاندی کو سیسے سے تبدیل کیا۔ واقعے کے بعد دونوں اہلکاروں کے خلاف مقدمہ درج کر کے انہیں گرفتار کر لیا گیا ہے اور مزید کارروائی جاری ہے۔
گرفتار ہونے والوں میں عارف علی جمانی اور سمیع اللہ اچکزئی شامل ہیں۔
