شہر قائد میں ماڈل اور اداکارہ حمیرا اصغر کی لاش دو دن سے چھیپا کے سرد خانے میں موجود ہے مگر اب تک کسی قریبی رشتہ دار نے لاش وصول کرنے میں دلچسپی نہیں لی۔ پولیس کے مطابق صرف خونی رشتہ دار کو ہی میت حوالے کی جا سکتی ہے، جبکہ بہنوئی کی جانب سے لاش لینے کی کوشش کی گئی مگر قانونی رکاوٹ کے باعث ممکن نہ ہو سکا۔
اداکارہ حمیرا اصغر کی لاش چھ ماہ تک ان کے کمرے میں پڑی رہی تھی، جس کے بعد اب بھی تنہائی کی حالت میں سرد خانے میں موجود ہے۔ ریسکیو ادارے چھیپا کے ترجمان شاہد چوہدری کا کہنا ہے کہ اگر چند دنوں میں کسی نے لاش وصول نہ کی تو اسے امانتا مواچھ گوٹھ قبرستان میں دفنا دیا جائے گا۔
اس صورتحال پر وزیر ثقافت و سیاحت سندھ سید ذوالفقار علی شاہ نے اداکارہ کی تدفین کرانے کا اعلان کیا ہے۔ ان کے مطابق اگر ورثا لاش وصول نہیں کرتے تو محکمہ ثقافت سندھ تدفین کے انتظامات کرے گا۔ سیکریٹری ثقافت نے ڈی آئی جی ساؤتھ کو لاش حوالگی کے لیے خط بھی لکھ دیا ہے۔
دوسری جانب، ماہرین نفسیات اس واقعے کو شہری معاشرے میں بڑھتی تنہائی اور سماجی بے حسی کا عکس قرار دے رہے ہیں۔
