وفاقی وزیر مواصلات عبدالعلیم خان کا کہنا ہے کہ این ایچ اے کے ترقیاتی منصوبوں میں تاخیر ہرگز برداشت نہیں کی جائے گی۔ افسران کو آخری موقع دیتے ہوئے کام کی رفتار تیز کرنےکی ہدایت کردی۔
وفاقی وزیر مواصلات عبدالعلیم خان کی زیر صدارت نیشنل ہائی وے اتھارٹی کا اہم اجلاس ہوا جس میں جاری ترقیاتی منصوبوں کا تفصیلی جائزہ لیا گیا۔
عبدالعلیم خان نے کہا کہ ترقیاتی منصوبوں کی رفتار میں تاخیر برداشت نہیں کی جائے گی، افسران اپنی ذمہ داریاں پوری کریں، مزید مہلت نہیں ملے گی۔ سستی یا نااہلی پر سخت کارروائی کی جائے گی۔
وفاقی وزیر نے بتایا کہ این ایچ اے کے اہم منصوبوں کا افتتاح وزیراعظم کریں گے۔ انہوں نے مری ایکسپریس وے پر ریسٹ ایریاز بنانے اور لیاری ایکسپریس وے کی معیاری تعمیر جلد مکمل کرنے کی ہدایت دی۔ متعلقہ حکام کو گوادر کو منسلک کرنے والی مرکزی شاہراہ مارچ 2026 تک مکمل کرنے کی ہدایت بھی کردی۔
اجلاس کے دوران ایم ایٹ، لیاری ایکسپریس وے، مانسہرہ، ناران جھال کنڈ سمیت دیگر منصوبوں کی رپورٹ پیش کی گئی۔ بلوچستان، خیبر پختونخوا اور سندھ کی اہم شاہراہوں پر کام کی رفتار تیز کرنے کی ہدایت کی گئی۔ وفاقی وزیر نے ناجائز تجاوزات کے خلاف بلا امتیاز کارروائی کی ہدایت دی جبکہ تجاوزات ہٹانے کی رپورٹ بھی پیش کی گئی۔
