ڈی جی آئی ایس پی آر لیفٹیننٹ جنرل احمد شریف چوہدری کا کہنا ہے کہ پاکستان کا ایٹمی پروگرام مکمل طور پر محفوظ ہے، کوئی بھی ہمارے ایٹمی پروگرام کو نشانہ بنانے کی جرات نہیں کرسکتا۔
الجزیرہ ٹی وی کو خصوصی انٹرویو میں ڈی جی آئی ایس پی آر نے کہا کہ پاکستان ایک ذمہ دار اور ڈکلیئرڈ ایٹمی طاقت ہے، پاکستان کی جوہری صلاحیت ناقابل تسخیر ہے، پاکستان کی دفاعی صلاحیتوں اور موجودہ علاقائی توازن پر اعتماد کی عکاسی کرتا ہے۔
لیفٹیننٹ جنرل احمد شریف چوہدری نے کہا کہ بھارت نے دہشتگردی کو ریاستی پالیسی کے طور پر پاکستان کیخلاف اپنایا ہوا ہے، بھارت کے یہ مذموم عزائم ملکی سلامتی بالخصوص بلوچستان کو غیرمستحکم کرنے کی منظم سازش ہے۔
ڈی جی آئی ایس پی آر نے کہا کہ خوارج کی اصطلاح ریاست اور فوج پرحملہ آور مسلح گروہوں کےلیے استعمال کرتے ہیں۔ فتنہ الہندوستان کی اصطلاح بھارت کے حمایت یافتہ دہشتگردوں کیلئے استعمال ہوتی ہے۔ فتنہ الخوارج اس گمراہ نظریے کا تسلسل ہے جو مسلمانوں کو اپنے گمراہ عقیدے کے تحت قتل کرتے ہیں۔ فتنہ الہندوستان خصوصاً بلوچستان میں ملک کو غیرمستحکم کرنے کےلیے سرگرم ہیں۔
ترجمان پاک فوج نے کہا کہ اسلام میں جہاد یا قتال کا اختیار صرف ریاست کے پاس ہے،کسی فرد، تنظیم یا گروہ کو نہیں، فتنہ الخوارج کا اسلام، انسانیت، پاکستان یا پاکستانی روایات سے کوئی تعلق نہیں۔
لیفٹیننٹ جنرل احمد شریف چوہدری نے کہا کہ بھارت قیادت متعدد مواقع پر پاکستان میں دہشتگردی کی پشت پناہی کا اعتراف کرچکی ہے، بھارتی سرپرستی میں ہونیوالی دہشتگردی نیٹ ورک کا ماسٹر مائنڈ اجیت دوول ہے۔ امریکا اور کینیڈا سمیت کئی ممالک بھارتی ریاستی دہشتگردی کا اعتراف کرچکے ہیں۔
ڈی جی آئی ایس پی آر لیفٹیننٹ جنرل احمد شریف چوہدری نے اسرائیل کی جارحیت کا نشانہ بننے والے ایران کیلئے حمایت کا اعادہ کیا۔
الجزیرہ کے مطابق ڈی جی آئی ایس پی آر کا یہ ردِ عمل گزشتہ ماہ وزیرستان بم دھماکے بعد سامنے آیا، دھماکے میں 16 فوجی جوان شہید جبکہ 20 سے زائد افراد زخمی ہوئے تھے ،حملے کی ذمہ داری فتنہ الخوارج (کالعدم ٹی ٹی پی) نے قبول کی تھی، پاکستان کا واضح مؤقف ہے کہ ان حملوں میں بھارت براہ راست ملوث ہے۔
