پشاور ہائی کورٹ نے وزیراعلیٰ خیبرپختونخوا علی امین گنڈا پور کی حفاظتی ضمانت میں توسیع کرتے ہوئے متعلقہ اداروں کو درج مقدمات میں گرفتاری سے روک دیا۔
پشاور ہائیکورٹ کے جسٹس صاحبزادہ اسد اللہ کی سربراہی میں 2 رکنی بینچ نے وزیراعلیٰ خیبرپختونخوا کی ضمانت کے کیس کی سماعت کی۔ وکیل درخواست گزار نے عدالت کو بتایا کہ وزیراعلیٰ کی مقدمات تفصیلات اور حفاظتی ضمانت کیلئے کیس دائر کیا ہوا ہے۔
اسسٹنٹ اٹارنی جنرل نے عدالت کا آگاہ کیا کہ وفاقی حکومت کی رپورٹ کے مطابق علی امین گنڈاپور کیخلاف 48 ایف آئی آر اسلام آباد میں درج ہیں، ایف آئی اے کی دو انکوائریز ہیں، نیب اور اینٹی کرپشن کی رپورٹ نہیں آئی۔
جسٹس صاحبزادہ اسد اللہ نے ریمارکس دیتے ہوئے کہا کہ یہ صوبے کے وزیراعلیٰ ہیں، ہر دوسرے دن تو عدالت نہیں آسکتے، وزیراعلیٰ کو اور کام کرنے ہیں، آپ رپورٹ کرکے اس کیس کو ختم کریں۔
عدالت نے علی امین گنڈاپور کی حفاظتی ضمانت میں توسیع کردی اور علی امین گنڈاپور کو درج مقدمات میں گرفتار نہ کرنے کا حکم دے دیا۔
