ایئرچیف مارشل ظہیر احمد بابر سدھو کا کہنا ہے کہ پاک فضائیہ کی کامیابی اللہ کی عنایت اور قومی اتحاد و یکجہتی کا نتیجہ ہے۔
ایئرچیف مارشل ظہیر احمد بابر سدھو نے اسپیکر قومی اسمبلی کو جوابی خط لکھ دیا۔ سردار ایاز صادق کے پارلیمانی کردار کی تعریف کی ۔ ائیر چیف مارشل نے قومی اہداف کی تکمیل کے لئے ہر ممکن تعاون جاری رکھنے کے عزم کا اعادہ کیا ۔
جوابی خط میں پاک فضائیہ کے سربراہ نے کہا بھارتی جارحیت کیخلاف قومی یکجہتی میں اسپیکر کا کردار قابل ستائش ہے۔ قومی اتحاد کے مظاہرے پر پارلیمانی قیادت کے شکرگزار ہیں ۔ پاک فضائیہ کی کامیابی اللہ کی عنایت اور قومی اتحاد و یکجہتی کا نتیجہ ہے۔
ایئرچیف نے کہا کہ قومی اتحاد و یکجہتی کے باعث دشمن کے عزائم خاک میں ملا پائے ۔ دشمن کی جارحیت کا جواب دینے پر پارلیمانی و قومی قیادت کا خراج تحسین ناقابل فراموش ہے۔ اسپیکر قومی اسمبلی نے بھارتی جارحیت کا منہ توڑ جواب دینے پر فیلڈ مارشل اور ایئر چیف مارشل کو خطوط ارسال کئے تھے۔
