وزیرِ اعظم شہباز شریف نے بجلی کے شعبے میں نقصان کرنے والی جینکوز کی نیلامی کے مراحل جلد مکمل کرنے کی ہدایت کرتے ہوئے کہا ہے نجکاری کی طرح جینکوز کی نیلامی کا عمل میڈیا پر براہ راست نشر کیا جائے جبکہ اسمارٹ میٹرز کی تنصیب مکمل کرکے جلد رپورٹ پیش کرنے کا حکم بھی دے دیا۔
بدھ کے روز اسلام آباد میں بجلی کے شعبے کی جاری اصلاحات پر جائزہ اجلاس کی صدارت کرتے ہوئے وزیرِ اعظم شہباز شریف نے کہا اصلاحات میں عوام اور صنعتوں کو بلاتعطل بجلی فراہمی اوٌلین ترجیح ہے۔
وزیر اعظم کا کہنا تھا کہ وفاقی حکومت کا بلوچستان میں ٹیوب ویلز کی سولرآئیزیشن کا منصوبہ مکمل ہوچکا ہے جس سے صوبے کی زرعی پیداور میں اضافہ ہوگا۔
وزیراعظم نے بجلی کی تقسیم کار کمپنیوں کی نجکاری کا عمل تیز کرنے کی بھی ہدایت کی اور کہا قابل تجدید توانائی کے ماحول دوست اور کم لاگت منصوبوں پر کام جاری ہے۔
شہباز شریف نے ہدایت کی کہ ملک بھر میں الیکٹرک وہیکل چارجنگ اسٹیشنز کے قیام کا عمل بھی تیز کیا جائے جبکہ انہوں نے بجلی کے ترسیل و ٹرانسمیشن نظام کی بہتری کیلئے منصوبوں پر کام جلد شروع کرنے کی بھی ہدایت کی۔
اجلاس کو بجلی کی پیدوار ، ترسیل اور تقسیم سے متعلق جاری اصلاحات اور منصوبوں پر بریفنگ بھی دی گئی ۔
