پاکستان نے بنگلہ دیش کو دوسرے ٹی ٹوینٹی میچ میں 57 رنز سے شکست دیتے ہوئے 2021 کے بعد پہلی ٹی ٹوینٹی ہوم سیریز جیت لی ہے ۔
تفصیلات کے مطابق بنگلہ دیش کی پوری ٹیم پاکستان کی جانب سے دیئے گئے 202 رنز کے ہدف کے تعاقب میں 19 اوورز میں 144 رنز بنا کر آوٹ ہو گئی اور 57 رنز سے شکست کا سامنا کرنا پڑا ۔
بنگلہ دیش کی جانب سے تنظیم حسن 50 رنز کے ساتھ سرفہرست رہے جبکہ تنزید حسن 33 اور مہدی حسن 23 رنز بنانے میں کامیاب ہوئے ۔
پاکستان کے سپنر ابرار احمد نے شاندار باولنگ کا مظاہرہ کرتے ہوئے 3 کھلاڑیوں کو پولین کی راہ دکھائی جبکہ حسن علی، فہیم اشرف، حارث روف ، شاداب خان ، خوشدل شاہ اور صائم ایوب نے ایک ایک وکٹ حاصل کی ۔
اس سے قبل پاکستان ٹیم نے ٹاس جیت کر بیٹنگ کا فیصلہ کیا اور مقررہ 20 اوورز میں 6 وکٹوں کے نقصان پر 201 رنز بنائے جس میں صاحبزادہ فرحان نے 74 رنز کی شاندار اننگ کھیلی ۔
محمدحارث 41 جبکہ حسن نواز نے شاندار بلے بازی کا مظاہرہ کرتے ہوئے 51 رنز بنائے ، سلمان آغا 19 اور صائم ایوب 4 سکور بنانے میں کامیاب ہوئے ۔
بنگلہ دیش کی جانب سے محسن محمود اور تنظیم حسن نے دو دو کھلاڑیوں کو آوٹ کیا جبکہ راشد حسین نے ایک وکٹ حاصل کی ۔
