وزیر اعظم کے مشیر رانا ثناء اللہ کا کہنا ہے کہ پاکستان تحریک انصاف ( پی ٹی آئی ) اگر اب عسکری قیادت کو برا بھلا کہے گی تو سیاسی طور پر اپنا نقصان کرے گی۔
سماء کے پروگرام "ریڈلائن" میں گفتگو کرتے ہوئے رانا ثناء اللہ کا کہنا تھا کہ آج خیبر پختونخوا میں پُرامن احتجاج ہوا ، مظاہرین پر شیلنگ اور لاٹھی چارج نامناسب عمل ہے، پیپلز پارٹی کے کارکن اور کے پی کے عوام کرپشن کے خلاف احتجاج کر رہے تھے، پی ٹی آئی کہتی ہے احتجاج کا حق ہونا چاہیے تو دوسروں کو بھی یہ حق دینا چاہیے، تحریک انصاف سے پُرامن احتجاج کی توقع نہیں کی جاسکتی۔
وزیر اعظم کے مشیر کا کہنا تھا کہ جنگ کے بعد مودی اپنی پوزیشن برقرار نہیں رکھ پائیں گے، اللہ تعالیٰ نے ہمیں جنگ میں کامیاب کیا ، مودی اور بھارت کو نقصان ہو چکا ہے، پاکستان مؤثر دفاع کرنے میں کامیاب نہ ہوتا تو سب سے بڑا ہدف فیلڈ مارشل ہوتے، قوم ، حکومت اور مسلح افواج کا ہر فرد سرخرو ہوا ہے۔
رانا ثناء اللہ کا کہنا تھا کہ اللہ تعالیٰ نے فیلڈ مارشل عاصم منیر ، صدرمملکت آصف زرداری اور وزیراعظم شہباز شریف کی قیادت میں ہمیں عزت دی، اللہ تعالیٰ نے فیلڈ مارشل عاصم منیر کو سروخرو کیا ہے اور عاصم منیر کے خلاف ہر وقت مہم چلانے والوں کو نقصان ہوا ہے، جس کا نقصان ہوا ہے وہ اس سے بچ نہیں سکتا۔
ان کا کہنا تھا کہ اب یہ کس منہ سے فیلڈ مارشل کو برا بھلا کہیں گے، پی ٹی آئی اب فوج کی قیادت کو برا بھلا کہے گی تو سیاسی طور پر اپنا نقصان کرے گی، وزیر اعظم نے ایوان میں 2 بار پی ٹی آئی کو بات چیت کی پیشکش کی ہے اور کہا پی ٹی آئی چاہے تو اسپیکر چیمبر میں بھی آجاؤں گا جبکہ وزیراعظم نے آج تک بات چیت کی پیشکش واپس نہیں لی ، ایسا ہو بھی نہیں سکتا۔
انہوں نے کہا کہ پی ٹی آئی اسپیکر چیمبر میں جا کر کہے بات کرنی ہے تو وزیر اعظم اپنی بات پرعمل کریں گے۔
ان کا مزید کہنا تھا کہ پنجاب میں بلدیاتی انتخابات کرا دینے چاہئیں ، اس سے اچھا وقت نہیں ہوسکتا، پارٹی قیادت اور وزیر اعلیٰ مریم نواز پنجاب میں بلدیاتی انتخابات کیلئے جلد فیصلہ کریں گے۔
