وفاقی حکومت نے بیرون ملک سے ڈیپورٹ ہونیوالے افراد کیخلاف سخت کارروائی کا فیصلہ کرلیا، ایسے افراد کیخلاف مقدمات درج اور پاسپورٹ منسوخ کیے جائیں گے۔
وفاقی وزیر داخلہ محسن نقوی کی زیرصدارت اہم اجلاس ہوا جس میں بیرون ممالک سے ڈیپورٹ ہوکر آنیوالے پاکستانیوں سے متعلق اہم فیصلے کیے گئے۔
اجلاس میں فیصلہ کیا گیا کہ ڈی پورٹ ہونیوالے افراد کیخلاف مقدمات درج اور ان کے پاسپورٹ منسوخ کر دیئے جائیں گے جبکہ انہیں 5 سال کیلئے پاسپورٹ کنٹرول لسٹ میں شامل کیا جائے گا۔
محسن نقوی کا کہنا تھا کہ ڈیپورٹ ہونیوالے افراد پاکستان کیلئے بین الاقوامی سطح پر شرمندگی کا باعث بن رہے ہیں، آئندہ ان سے کوئی رعایت نہیں برتی جائے گی۔
انہوں نے بتایا کہ پاسپورٹ کے قوانین کو مزید سخت اور مؤثر بنانے کیلئے سیکریٹری داخلہ کی سربراہی میں خصوصی کمیٹی بھی قائم کردی گئی ہے۔
