بلوچستان میں سیکیورٹی فورسز نے 2 الگ الگ کارروائیوں میں بھارتی پراکسی بلوچستان لبریشن فرنٹ ( بی ایل ایف ) کے 3 دہشتگردوں کو ہلاک کردیا۔
پاک فوج کے شعبہ تعلقات عامہ ( آئی ایس پی آر ) کی جانب سے جاری کردہ بیان کے مطابق سیکیورٹی فورسز نے 17-18 مئی کی درمیانی شب بلوچستان کے ضلع آواران کے علاقے گشکور میں خفیہ اطلاعات کی بنیاد پر آپریشن کیا جس کے دوران شدید فائرنگ کے تبادلے میں یونس نامی دہشتگرد ہلاک اور 2 دہشت گرد زخمی ہوگئے۔
ضلع کیچ کے شہر تربت میں دوسری کارروائی کے دوران بی ایل ایف کے 2 دہشتگرد مارے گئے جن میں دہشتگردوں کا سرغنہ صابر اللہ اور دہشتگرد امجد عرف بیچو شامل ہیں۔
آئی ایس پی آر کے مطابق مارے گئے دہشتگردوں سے اسلحہ، گولہ بارود اور دھماکا خیز مواد بھی برآمد کیا گیا جبکہ ہلاک دہشتگرد قانون نافذ کرنے والے اداروں کیخلاف کارروائیوں اور شہریوں کی ٹارگٹ کلنگ میں ملوث تھے۔
بیان میں بتایا گیا کہ علاقے میں کسی بھی ممکنہ دہشتگرد کی موجودگی کے پیش نظر سینیٹائزیشن آپریشنز جاری ہیں۔
آئی ایس پی آر کا مزید کہنا تھا کہ سیکیورٹی فورسز بلوچستان کے امن ، استحکام اور ترقی کو سبوتاژ کرنے کی کوششوں کو ناکام بنانے کیلئے پرعزم ہیں۔
وزیر داخلہ کا خراج تحسین
دوسری جانب وفاقی وزیر داخلہ محسن نقوی کی جانب سے کامیاب کارروائی پر سکیورٹی فورسز کو خراج تحسین پیش کیا گیا ہے۔
اپنے بیان میں وزیر داخلہ کا کہنا تھا کہ بھارتی پراکسی کے دہشتگردوں کو عبرتناک انجام تک پہنچانے والوں کو شاباش دیتے ہیں اور سیکیورٹی فورسز نے بروقت کارروائی کرکے دہشتگردوں کے ناپاک عزائم کو خاک میں ملایا ہے۔
محسن نقوی کا کہنا تھا کہ بلوچستان میں قیام امن کیلئے سیکیورٹی فورسز کے اقدامات قابل ستائش ہیں جبکہ سکیورٹی فورسز کے بہادر سپوت قوم کا فخر ہیں اور پوری قوم اُن کے ساتھ کھڑی ہے۔
