پاکستان کی بین الپارلیمانی سفارتی محاذ پر ایک اور بڑی کامیابی،اسلامی ملکوں کی پارلیمانی تنظیم نے بھارت کے خلاف 3قراردادیں منظور کر لیں۔
مسلم ممالک کی پارلیمان کا 19واں اجلاس انڈونیشیا کے دارالحکومت جکارتہ میں اختتام پذیرہوگیا،اجلاس کےدوران بھارت کے خلاف تین اہم قراردادیں منظور کی گئیں۔پہلی قرارداد میں مقبوضہ کشمیر میں بھارتی مظالم،بالخصوص خواتین و بچوں کی حالت زار پر شدید تشویش کا اظہار کیا گیا۔
دوسری قرارداد بھارت میں مسلمانوں کی مذہبی و ثقافتی عمارتوں کی بے حرمتی کے خلاف تھی۔تیسری قرارداد میں مسئلہ کشمیر کو اقوام متحدہ کی قراردادوں اور کشمیریوں کی خواہشات کے مطابق حل کرنے پر زور دیا گیا۔
پاکستانی وفد نے بھارتی فسطائیت اور ریاستی جبر کو موثر انداز میں بے نقاب کیا۔اسپیکر قومی اسمبلی سردار ایاز صادق کی سربراہی میں میاں فتح اللہ،داوڑ کنڈی اور عقیل ملک نے پاکستان کا مؤقف بھرپور انداز میں پیش کیا۔
مسلم ممالک کے وفود نے پاکستانی مؤقف کی تائید کی اور بھارت کو منہ توڑ جواب دینے پر وفد کو سراہا۔اجلاس کے اختتام پر ’’اعلانِ جکارتہ‘‘ بھی جاری کیا گیا جو پاکستان کی کامیاب سفارت کاری کا مظہر ہے۔
