ترکیہ کے صدر رجب طیب ایردوان نے پاکستانی قوم کی حمایت کا واضح اعلان کردیا۔
ترک کابینہ اجلاس سے خطاب کرتے ہوئے صدر رجب طیب ایردوان کا کہنا تھا کہ پاکستان اور بھارت کے درمیان جنگ بندی پر ہمیں خوشی ہے اور ہم نے کشمیر میں وحشیانہ دہشتگرد حملے اور پاکستان پر میزائل حملوں پر واضح موقف کا اظہار کیا ہے۔
صدر ایردوان کا کہنا تھا کہ دونوں ممالک کے درمیان انتہائی خطرناک تناؤ کو کم کرنے کیلئے انتھک کوششیں کیں۔
انہوں نے کہا کہ اپنے بھائی وزیراعظم شہباز شریف کو ٹیلی فون کیا اور ان سے اہم گفتگو ہوئی، پاکستانی بھائیوں کو ان کے صبر و تحمل اور دانشمندانہ موقف پر ایک بار پھر مبارک پیش کرتا ہوں۔
رجب طیب ایردوان نے مشورہ دیا کہ اشتعال انگیزی میں نہ پھنسیں۔
ان کا کہنا تھا کہ خواہاں ہیں کہ جنگ بندی سے تمام مسائل بالخصوص پانی کے مسئلے کے حل کو آسان بنائے۔
انہوں نے مزید کہا کہ ترکیہ ان شاء اللہ برادر پاکستانی قوم کے ساتھ ان کے اچھے اور برے دنوں میں کھڑا رہے گا۔
