پاکستانی اداکارہ ماورا حسین نے بھارتی اداکار ہرش وردھن رانے کو سوشل میڈیا پر بھرپور جواب دیتے ہوئے کہا ہے کہ جنگی حالات میں پی آر اسٹریٹجی کے ذریعے صرف توجہ حاصل کرنے کی کوشش انتہائی شرم کی بات ہے۔
ماورا حسین کے ساتھ بھارتی فلم ’’صنم تیری قسم‘‘ میں کام کرنیوالے ادکاارہ ہرش وردھن رانے نے حال ہی میں پاکستان کے خلاف زہر اُگلتے ہوئے کہا تھا کہ اگر فلم ”صنم تیری قسم“ کے سیکوئل میں ماورا حسین کو کاسٹ کیا گیا تو وہ اس فلم کا حصہ نہیں بنیں گے۔
ماورا حسین نے انسٹاگرام پر ایک طویل پیغام شیئر کرتے ہوئے ہرش وردھن رانے کو سخت ردعمل دیا۔ ان کا کہنا تھا کہ یہ صرف شہرت حاصل کرنے کا ایک طریقہ ہے، کیونکہ یہ سب اچانک نہیں ہوا۔
ماورا حسین نے مزید کہا کہ ہمیں روزانہ دھماکوں کی آوازیں سننی پڑ رہی ہیں، ہمارے بچے بزدلانہ حملوں میں مارے جارہے ہیں اور امن قائم کرنے کی جتنی کوششیں کی گئیں، تمہارے ملک نے وہ سب ناکام بنا دی ہیں۔
پاکستانی اداکارہ کا کہنا تھا کہ جب ہمارا ملک جنگ کی حالت میں ہے، تو تم پی آر اسٹریٹجی کے ذریعے صرف توجہ حاصل کرنے کی کوشش کر رہے ہو، جو کہ انتہائی شرم کی بات ہے۔
ماورا حسین نے کہا کہ انہوں نے ہمیشہ اپنے ساتھی اداکاروں کی عزت کی ہے اور یہی سلسلہ جاری رکھیں گی۔ وہ مزید کہتی ہیں کہ انہیں ”صنم تیری قسم“ میں کام کرنے کی پیشکش ہوئی تھی، جس پر انہوں نے کام کیا، لیکن وہ ہرش وردھن کی طرح زہر نہیں اُگلیں گی۔
انہوں نے یہ بھی کہا کہ اگر نو سال بعد تمہیں میری شہرت سے فائدہ ہو رہا ہے تو اس کا مطلب ہے کہ تمہاری ٹیم غلط ہے۔ وہ بھارتی اداکار کی جانب سے جنگی حالات کا ذاتی فائدہ اٹھانے پر افسوس کا اظہار کرتی ہیں۔
ماورا نے اپنی دعائیں پاکستان کی افواج اور دونوں ممالک کے شہریوں کے ساتھ رکھی ہیں اور کہا کہ ان کیلئے سب سے اہم میرا ملک پاکستان ہے۔ آخر میں انہوں نے ”پاکستان زندہ باد“ کا نعرہ بھی لگایا۔
ماورا حسین کے اس ردعمل نے ان کے مداحوں میں پذیرائی حاصل کی اور وہ ہرش وردھن رانے کی حقیقت کو بے نقاب کرنے پر ان کی تعریف کرنے لگے۔
