وزیراعظم شہباز شریف کی جانب سے خطے میں امن کیلئے کردار ادا کرنے پر امریکی صدر ڈونلڈ ٹرمپ سے اظہار تشکر کیا گیا ہے۔
واضح رہے کہ پاکستان اور بھارت کے درمیان جنگ بندی کا اعلان ہوچکا ہے اور اس حوالے سے امریکی صدر ڈونلڈ ٹرمپ نے بتایا تھا کہ دونوں ممالک سیز فائز پر تیار ہوگئے ہیں جس کی تصدیق پہلے پاکستانی وزیر خارجہ اسحاق ڈار اور بعدازاں، بھارتی وزیر خارجہ جے شنکر کی جانب سے بھی کی گئی۔
امریکی صدر نے سوشل میڈیا اکاؤنٹ پر جاری اپنے بیان میں کہا تھا کہ پاکستان اور بھارت امریکا کی ثالثی میں فوری جنگ بندی پر متفق ہوئے ہیں اور دونوں نے مکمل اور فوری جنگ بندی پر رضامندی ظاہر کی ہے۔
ڈونلڈ ٹرمپ کی جانب سے دونوں ممالک کو مبارکباد بھی پیش کی گئی اور مزید کہا گیا کہ دونوں ممالک نے دانشمندی کا مظاہرہ کیا ہے۔
اس حوالے سے سماجی رابطے کے پلیٹ فارم ایکس پر وزیر اعظم شہباز شریف کی جانب سے خصوصی بیان جاری کیا گیا جس میں انہوں نے امریکی صدر سے اظہار تشکر کرتے ہوئے کہا کہ ہم نے خطے کے امن واستحکام کے مفاد میں فیصلہ کیا ہے اور امن و سلامتی کیلئے امریکا کے کردار کو سراہتے ہیں۔
شہباز شریف کا کہنا تھا کہ امریکی نائب صدر ، سیکرٹری خارجہ مارکوروبیو کی امن کی کاوشوں کو بھی سراہتے ہیں۔
بھارت کے حملے اور پاکستان کا جواب
یاد رہے کہ 6 اور 7 مئی کی درمیانی شب بھارت کی جانب سے پاکستان اور آزاد کشمیر کے مختلف علاقوں پر حملے کیے گئے جس پر جوابی کارروائی میں پاکستان نے بھارت کے 5 جنگی طیارے مار گرائے۔
پاکستان کی جانب سے متعدد بار تنبیہ کے باوجود بھارتی جارحیت میں اضافہ دیکھنے میں آیا جس میں ڈرون حملوں کے بعد میزائلوں کے ذریعے پاکستانی ایئر بیسز کو نشانہ بنانے کی کوشش کی گئی۔
صورتحال کے تناظر میں پاکستان نے 10 مئی کی صبح ’ آپریشن بنیان مرصوص ‘ کا آغاز کیا اور فیصلہ کن کارروائی کرتے ہوئے بھارتی فضائی تنصیبات کو نشانہ بنایا۔
پاکستان نے فتح-1 میزائل سسٹم کے ذریعے بھارت کے متعدد اہداف کو کامیابی سے نشانہ بنایا۔
پاکستانی افواج نے ادھم پور، آدھم پور اور پٹھان کوٹ سمیت کئی اہم ایئر بیسز کو تباہ کر دیا۔
آدم پور میں پاک فضائیہ نے جے ایف-17 تھنڈر طیارے سے داغے گئے ہائپر سونک میزائل کے ذریعے بھارتی ایئر بیس پر نصب 1.5 ارب ڈالر مالیت کا ایس-400 ایئر ڈیفنس سسٹم بھی تباہ کیا۔
اس کے ساتھ ساتھ بھارتی ریاست مہاراشٹرا میں بجلی فراہم کرنے والی ایک بڑی کمپنی پر سائبر حملہ کر کے پورے نظام کو مفلوج کر دیا گیا جبکہ بھارت کے ملٹری سیٹلائٹ کو بھی جام کر دیا گیا۔
مزید برآں، پاکستانی ڈرونز نے بھارتی ریاست گجرات کی فضاؤں میں کئی گھنٹوں تک پرواز کر کے اپنی برتری کا مظاہرہ کیا۔
بھٹنڈا ایئر فیلڈ کو بھی پاکستانی کارروائی میں شدید نقصان پہنچایا گیا جس سے بھارت کی دفاعی صلاحیت پر سوالات اٹھنے لگے ہیں۔
