سائنسدانوں نے شمال مشرقی برازیل کے چونے کے پتھر سے تقریباً 113 ملین سال قدیم چیونٹی کی باقیات دریافت کی ہیں۔
بین الاقوامی میڈیا کے مطابق یہ چیونٹی ’Vulcanidris Cratensis‘ نامی نسل سے تعلق رکھتی ہے جسے اس کے خوفناک جبڑوں کی وجہ سے ’ہیل اینٹس‘ بھی کہا جاتا ہے۔
یہ نسل مکمل طور پر ناپید ہو چکی ہے اور آج کے دور میں اس کی کوئی چیونٹی موجود نہیں۔
یونیورسٹی آف ساؤ پالو کے میوزیم آف زولوجی کے ماہر حیاتیات اینڈرسن لیپیکو کی سربراہی میں کی گئی یہ تحقیق جرنل ’کرنٹ بائیولوجی‘ میں شائع ہوئی ہے۔
لیپیکو کے مطابق یہ چیونٹیاں اپنے جبڑوں کا استعمال شکار کو سنبھالنے کے لیے کرتی تھیں جو موجودہ چیونٹیوں کے جبڑوں سے مختلف ہیں۔
انہوں نے بتایا کہ اس دریافت نے انہیں حیران کر دیا۔
لیپیکو نے کہا کہ مالیکیولر تخمینوں کے مطابق چیونٹیاں 168 سے 120 ملین سال قبل وجود میں آئیں۔
وہ زمین پر بڑی تعداد میں پائی جاتی ہیں اور شکار کرنے، دیگر جانداروں کی آبادی کو کنٹرول کرنے، اور مٹی کا معیار بہتر کرنے جیسے اہم کردار ادا کرتی ہیں۔
ان کے مخصوص پودوں اور کیڑوں سے تعلقات بھی ہوتے ہیں جو انہیں دیگر جانوروں سے تحفظ فراہم کرتے ہیں۔
